Microsoft korporasiyası Təhsil Nazirliyi ilə korporasiyası arasında qarşılıqlı anlaşma haqqında imzalanmış memorandum çərçivəsində 2006-2007-ci illərdə Azərbaycanın təhsil sahəsində 10 layihə həyata keçirəcək. Bu barədə, Trend agentliyinin məlumatına əsasən, iyunun 22-də təhsil naziri Misir Mərdanov bildirib.
Onun sözlərinə görə, bu, təhsil müəssisələrinin kompüterləşdirilməsi, kompüterlərin yoxlanılması və müəllimlər üçün treninqlərin keçirilməsini nəzərdə tutan "Microsoft-un İnformasiya Texnologiyaları Akademiyası" və təhsil müəssisələrinə korporasiyanın lisenziya almış məhsullarının verilməsini nəzərdə tutan "Proqram təminatının xüsusi şərtlərlə lisenziyalaşdırma proqramı" kimi layihələrdir.
Microsoft-un Azərbaycandakı nümayəndəliyinin rəhbəri Vladimir Çaykovski bildirib ki, korporasiya Azərbaycanın İT bazarını sürətlə inkişaf edən bazar kimi qiymətləndirir və bu istiqamətdə, xüsusilə, sosial istiqamətli layihələrin gerçəkləşdirilməsində istənilən köməyi göstərmək niyyətindədir. "Korporasiya təhsil sahəsində İKT-nin tətbiqi üzrə 100-dən çox saziş imzalayıb və bu məsələdə kifayyət qədər təcrübəyə malikdir" - deyə o vurğulayıb.
Korporasiyanın MDB üzrə baş direktoru Sergiuş Viza qeyd edib ki, bütün bu layihələr qrant vəsaitləri hesabına həyata keçirilir.
Bundan sonra, korporasiya təhsil sahəsində İKT-dən istifadə üzrə milli strategiyanın və müəllimlər üçün təhsil portalın hazırlanmasında Təhsil Nazirliyinə köməklik göstərəcək.
