Azərbaycan İnternet qeydiyyatı strukturu domenlərin sayının artırılması ilə bağlı qəti addımlar atır. Trend in xəbər verdiyi kimi, bu gün "Intrans" şirkətinin başçısı, Azərbaycan İnternet qeydiyyatı strukturunun həmtəsisçisi Faiq Fərmanov bildirib ki, rabitə naziri Əli Abbasov da milli domenlərin inkişafında maraqlıdır.
"AZ domenlərinin qeydiyyatı tarifi oktyabrın 1-dən 33 % aşağı salınıb. Hesab edirik ki, bu, bütün prosesə əhəmiyyətli dərəcədə təsir göstərəcək", - deyə o qeyd edib.
İkinci addım isə "com", "org", "net" domnləri ilə qeydiyyata alınmış Azərbaycan saytlarının "az" milli domeninə keçməsinə nail olmaqdır. Üstəlik, müxtəlif veb-saytların ingilis dilində deyil, Azərbaycan dilində adlandırılmasını həyata keçirmək nəzərdə tutulub. Məsələn, ingilis variantında tebessum Azərbaycan variantında - təbəssüm adlandırılacaq.
Qısa müddət ərzində həmçinin ABŞ-da yerləşən "az" əsas serverinin Azərbaycana keçirilməsi nəzərdə tutulur. "Bu işlərin həyata keçirilməsi sayəsində Azərbaycanın İnternet sahəsinə müsbət təsirlər gözlənilir", - deyə o qeyd edib.
