Noyabrın ilk günləri Moskvada Rabitə sahəsində regional birliyin (RRB) komissiya və işçi qruplarının MDB ölkələrində informasiya cəmiyyətinin formalaşmasına həsr olunmuş toplantısı keçirilib. Tədbirin əsas məqsədi inkişafın mühüm məsələlərini həll etmək üçün İKT-dən səmərəli istifadə etmək məqsədilə RRB iştirakçılarının səylərini əlaqələndirməkdən ibarət olub. Azərbaycan tərəfdən toplantılarda Azərbaycan Rabitə və İnformasiya Texnologiyaları Nazirliyinin informasiya cəmiyyətinin inkişafı və maliyyə, uçot və iqtisadi təhlil şöbələrinin rəisləri Rüfət Gülməmmədov və Rəşad Nəbiyev iştirak edib.
Trend Rusiyanın İnformasiya Texnologiyaları və Rabitə Nazirliyinə istinadən xəbər verir ki, ən mühüm hadisə RRB-nin informatizasiya (Komissiyanın sədri- Rusiya İnformasiya Texnologiyaları idarəsinin rəhbərinin müavini A.İ.Pankratov) və rabitə iqtisadiyyatı üzrə (Komissiya sədrinin müavini - Rusiya İnformasiya Texnologiyaları və Rabitə Nazirliyi departamentinin direktoru L.S.Timoşenko) komissiyaların birgə toplantısı olub. Burada MDB ölkələri nümayəndələrinin onların ölkələrindəki informatizasiyanın vəziyyəti haqqında məruzələri dinlənilib, MDb ölkələrində informatizasiyanın inkişafının vəziyyətini səciyyələndirən göstərici sistemlərinin işlənməsinin nəticələri, RRB fəaliyyətinin strateji istiqamətləri, RRB-nin informasiya portalının yaradılması müzakirə edilib.
RRB fəaliyyətinin strateji istiqamətlərindən biri RRB əməkdaşlarının rəqəm fərqinin azaldılmasına yönəldilmiş rabitə və informatizasiyanın inkişafının razılaşdırılmış strategiyasının formalaşması və reallaşdırılması məsələlərində fəaliyyətinin koordinasiyası və əhalinin bütün təbəqələrinin informasiya-kommunikasiya texnologiyalarının vasitə və xidmətlərinə hər yerdə və məqbul çıxışının təmin olunmasıdır.
Fəaliyyətin bu istiqamətində uğurun başlıca amili işlərin vəziyyətinin adekvat qiymətləndirilməsi və məqsədli göstəricilər sistemi bazasında İKT tətbiqinin inkişafının proqnozlaşdırılmasıdır.
Birgə toplantıda informasiya və kommunikasiya texnologiyaları göstəriciləri sisteminin işlənmə və tətbiq keyfiyyətinin artırılması məqsədilə birgə işçi qrupun yaradılması haqqında qərar qəbul olunub. Ehtimal olunur ki, göstəricilərin geniş sistemi informasiya texnologiyalarının müxtəlif ölkələrdə inkişafı və tətbiqi haqqında obyektiv təsəvvür əldə etməyə, əldə olunmuş nəticələri qiymətləndirməyə, informasiya xidmətlərinin əsas istehlakçısı - əhalinin nöqteyi-nəzərindən informatizasiya üçün ayrılan ehtiyatlardan nə qədər səmərəli istifadə olunduğunu görməyə imkan verəcək.
