Azərbaycan, Bakı / Trend / Azərbaycanın mobil operatoru Azərcell Telecom öz abunəçilərinə xəbərdarlıq edir ki, iyunun 23-dən saat 02.00-dan başlayaraq gecə və səhər saatlarında telefon danışıqlarında, habelə bəzi xidmətlərin göstərilməsində mümkün çatışmazlıqlar yarana bilər. Bu, operatorun şəbəkənin təkmilləşdirilməsi ilə bağlı apardığı işlərlə əlaqədardır.
Şirkət mütəmadi olaraq rabitənin keyfiyyətinin artırılması məqsədilə işlər həyata keçirir. 2,5 milyon abunəçiyə malik Azərcell Telecom Azərbaycanın mobil rabitə bazarının 78 faizini və əhalinin 99 faizini əhatə edir. Həmçinin şirkətin dünyanın 130 ölkəsinin 300 operatoru ilə rouminq sazişi var.
Azərcell Telecom 1996-cı ilin yanvarında yaradılıb. Şirkət həmin ilin 15 dekabrında abunəçilərinə post-ödəmə prinsipi əsasında xidmətlər təklif etməklə fəaliyyətə başlayıb. Azərcell Telecom Azərbaycanın Rabitə və İnformasiya Texnologiyaları Nazirliyi (35.7faiz) və "Fintur Holdings BV" (64.3 faiz) şirkətinin birgə yaratdığı müəssisədir.
"Fintur Holding BV"nin səhmlərinin 41,45 faizi Türkiyənin "Turkcell" şirkətinə, 58,55 faizi isə "Teliasonera" şirkətinə məxsusdur.