Azərbaycan, Bakı, 20 avqust/ Trend , müxbir D.Xatınoğlu/ Fransanın Əfqanıstanda fəaliyyət göstərən sülhməramlılarından 10 nəfərin avqustun 19-da baş vermiş terror aktı nəticəsində həlak olması Fransa prezidentinin Əfqanıstana təcili səfərinin əsas səbəbidir. "Sarkozinin Kabilə səfəri Fransa sülhməramlılarının Əfqanıstanda həlak olmaları ilə bağlıdır", - deyə Əfqanıstan XİN-in sözçüsü Sultan Əhməd Behin Trend -a bildirib.
Fransa prezidenti Nikola Sarkozi avqustun 20-də Əfqanıstana səfər edib. Çərşənbə axşamı 10 nəfər Fransa sülhməramlısı Əfqanıstanın şərqində terrorçular tərəfindən öldürülüb.
Behin bildirib ki, Sarkozinin Əfqanıstana səfərinin iki əsas səbəbi var: "Birinci səbəb avqustun 19-da 10 nəfər Fransa sülhməramlısının terrorçuların ölkənin şərq regionlarında keçirdiyi terror nəticəsində həlak olması ilə bağlıdır. Sarkozi Əfqanıstanda fəaliyyət göstərən fransalı hərbçilərə dəstək vermək üçün Kabilə səfər edir. Digər səbəb - rəsmi Kabili bir daha arxayın etmək istəyir ki, bu ölkədə sabitliyin bərpası üçün Fransa daim əlindən gələn yardımı edəcək", - deyə Behin çərşənbə günü telefonla Kabildən bildirib.
Behin əlavə edib ki, Kabilin əfqan ordusunun nəzarətinə verilməsi planı bu ay həyata keçirilməlidir. Çox ehtimal ki, Sarkozinin Kabilə səfəri zamanı bu plan rəsmən həyata keçiriləcək. Behinin sözlərinə görə, Kabilin nəzarətinin əfqan qüvvələrinə tapşırılması NATO qüvvələrinin Kabildəki fəaliyyətinin və yerli qüvvələrə dəstəyinin kəsilməsi demək deyil.
Əfqanıstan Müdafiə Nazirliyinin sözçüsü general Məhəmməd Zahir Əzimi bu haqda Trend -a bildirib ki, Kabilin əfqan ordusunun nəzarəti altına keçməsi üçün hazırlıq görülür, lakin Sarkozinin səfərinin bu plana heç bir aidiyyatı yoxdur. "Sarkozi Fransa sülhməramlılarının həlak olması ilə bağlı hüzn və başsağlığını ifadə etmək və oradakı hərbçilərinin hakimiyyət tərəfindən tam himayə olunduqlarını bir daha bildirmək üçün Kabilə səfər edib", - deyə Əzimi bu gün telefonla Kabildən bildirib. O əlavə edib ki, bu həftə ərzində Kabilin təhlükəsizliyi yerli əfqan qüvvələrinə rəsmən tapşırılacaq. General Əziminin sözlərinə görə, Əfqanıstan ordusunda hazırda hərbi təlim görmüş 75 min nəfər xidmət edir. İl ərzində hərbçilərin təlimi üçün 9 milyard dollar vəsait ayrılıb.
Məqalə müəllifi ilə əlaqə saxlamaq üçün elektron ünvan [email protected]
