İran, Tehran, 29 noyabr/ Trend , müxbir: E. Namdari/ İran parlamentinin üzvləri bu ölkədə narkotik maddələrin istifadəsi metodunun dəyişdirilməsi barədə bəzi məlumatları təsdiq edərək bildiriblər ki, bu ictimai fəsadla mübarizə aparmaq üçün müvafiq komissiya heç bir layihə və proqrama malik edyil.
Ötən həftə İranın Səhiyyə Nazirliyindən bəzi mənbələr bildirmişdilər ki, ölkədə narkotik maddələrin qəbulu metodu tiryəkdən krak kimyəvi maddə ilə əvəzlənib.
İran parlamentinin nümayəndəsi və səhiyyə komissiyasının üzvü Bəşir Xaleqi bugün Trend - la qeyd edib ki, İranda kimyəvi narkotik maddələrinin qəbulu təhlükəli həddə çatıb və dövlət orqanları bu bardə düşünməlidirlər.
Xaleqi, eləcədə, ilk dəfə bildirib ki, parlament və dövlət tərəfindən bununla bağlı Səhiyyə Komissiyasına heç bir layihə təqdim edilməyib.
İranın Səhiyyə Təşkilatının rəhbərlərinin bildirdiyinə görə, narkotik maddələrdən istifadə işsizlikdən, yoxsulluqdan və sosial problemlərdən sonra bu ölkənin dördüncü əsas problemi sayılır.
İran parlamentinin sosial komissiyasının üzvü Cavad Zamani Trend - la müsahibəsində son illər ərzində sosial problemlərin artdığını təsdiq edərək qeyd edib ki, bu problemlərin kökündə işsizlik durur ki, dövlət və parlament onun səviyyəsinin aşağı salınması üçün müəyyən proqram və layihələr üzərində işləməlidir.
Zamani, eyni zamanda, bu sahədə bəzi statistik rəqəmləri məyusedici adlandıraraq, ölkədə bu sosial fəsadların yayılmasının qarşısının alınması üçün münasib həl yollarının tapılmasını istəyib.
O, bununla bağlı Sosial Komissiyaya hər hansı bir layihənin təqdim olub- olunmadığı sualına cavab verərkən bildirib ki, sözügedən komissiyaya belə bir layihə daxil olmayıb.
İslam Şurası Məclisinin üzvləri bu ölkədə ictimai və əxlaqi pozuntuların yayılmasını təsdiq ediblər, hal bu ki, onlar tərəfindən indiyədək bu problemlərin qarşısının alınması üçün heç bir tədbir görülməyib.
Baxmayaraq ki, rəsmi mənbələr ölkədə narkotik maddələrin satış qiyməti haqqında dəqiq statistika vermirlər, lakin, faktlar onu göstərir ki, narkotik maddələrin bəzi növlərinin qiyməti son iki ildə 50 faizədək azalıb.
"İran krakı" yüksək dozalı və çox təhlükəli heroin növüdür ki, onun həddindən artıq istifadəsi ölümlə nəticələnir.
Həmçinin, həmin kimyəvi maddəyə aludəçilik riski çox yüksəkdir.
Bu ölkədə mövcud olan krak növləri heroindən 150 dəfə artıq insanın düşüncəsi, beyni və əsəb sistemlərini pozmaq qabiliyyətinə malikdir.
Sözügedən səhiyyə orqanları, son iki ildə amfetamin, uyuşdurucu və kimyəvi maddələrdən istifadə səviyyəsinin nəzərə çarpacaq dərəcədə artdığını bildirirlər.
"Sərmayə" qəzetinin yazdığına görə, hal- hazırda Tehranda krak növünün tapdansatış qiyməti 5 milyon/kq və 7 min tümən/qr-dır.
İndiyədək İranda narkotik maddələr istehsalı ilə məşğul olan kimyəvi laboratoriyalar nəzərə çarpacaq dərəcədə mövcud deyildi. Lakin, Əfqanıstanda belə mərkəzllərin yaranması ilə və onda istifadə olunan kimyəvi maddələrin miqdarının çox olması ucbatından nəzərə almaq lazımdır ki, bunun qarşısının alınması üçün ciddi tədbir görülməsə, təbii olaraq, İran yaxın gələcəkdə heroin və krak istifadə edən əsas ölkə olacaqdır.
