Bakı. Trend:
Yeni Kaledoniyada seçki islahatlarına qarşı üsyanın arxasında dayanan "Sahə Fəaliyyəti Koordinasiya Hücrə"sinin lideri Kristian Thain daxil olmaqla 8 nəfər həbs edilib.
Trend bu barədə Fransa KİV-lərinə istinadən xəbər verir.
Hazırki struktur paytaxt Numeada etiraz əlaməti olaraq, barrikadalar təşkil edərək nəqliyyatın hərəkətinə və ərzaq təminatına mane olub.
Thain may ayında Yeni Kaledoniyaya səfəri zamanı Fransa prezidenti Emmanuel Makronla görüşən müstəqillik tərəfdarı siyasətçilər arasında olub.
Yeni Kaledoniyada iğtişaşlar Fransa parlamentinin yerli qanunvericilik məclisinə seçkilərin prosedurunu dəyişdirən qanunu qəbul etməsindən sonra başlayıb. Dəyişikliklərə əsasən, Fransadan gələn 10 ildir Yeni Kaledoniyada yaşayan ziyarətçilər səsvermə hüququna sahib olacaqlar.
Bu, Yeni Kaledoniyanın yerli əhalisi olan bir çox Kanakların narazılığına səbəb olub: onlar öz icmalarının siyasi çəkisinin azalacağından ehtiyat edirlər.
Yeni Kaledoniyada etirazçı lider Kristian Thain və daha 7 fəalın həbsi Fransa hökumətinin başlatdığı seçki islahatları nəticəsində bölgədə gərginliyin artdığını göstərir. Bu hadisələr siyasi təsirin itirilməsindən narahat olan yerli əhali arasında artan narazılıq dalğasını nümayiş etdirir. Üsyan və həbslər yerli əhali arasında yeni qarşıdurmalara və müqavimətə səbəb olan Fransanın neokolonial siyasətinin iflasa uğramasından xəbər verir.
(Tərcümə: Gülnarə Kərimova)