Bakı. Trend:
Çərşənbə günü Nyu-Yorkda 11 sentyabr 2001-ci il terror aktlarının qurbanlarının xatirəsinə həsr olunmuş "Tribute in Light" tədbiri keçirilir.
Trend-in məlumatına görə, güclü projektorların iki şüası terrorçular tərəfindən dağıdılmış əkiz qüllələri simvolizə edərək, səmaya yönəldilir. 100 km-ə qədər məsafədə görünən işıq sütunları yaratmaq üçün 44 projektordan istifadə olunur. Kampaniya 2002-ci ildən keçirilir.
Bundan əvvəl Nyu-Yorkda “Əkiz qüllələr”in yerindəki memorial kompleksdə terror aktları qurbanlarının xatirəsinə təntənəli mərasim keçirilib. Mərasim zamanı həlak olanların yaxınları onların adlarını oxuyub.
11 sentyabr 2001-ci ildə 19 "Əl-Qaidə" terrorçusu ABŞ-da dörd sərnişin təyyarəsini qaçırmışdı. Onlardan ikisini Dünya Ticarət Mərkəzinin qüllələrinə - o vaxt Nyu-Yorkun ən hündür binalarına göndərdilər; üçüncü isə Vaşinqton ətrafındakı Pentaqonun binasına yönləndirilmişdi. Dördüncü təyyarə də Amerika paytaxtına doğru uçurdu, lakin Pensilvaniya ştatının Şenksvill şəhəri yaxınlığında qəzaya uğradı. Terrakt nəticəsində 2977 nəfər həlak olub.