Bakı. Trend:
Boloniya bölgəsində yağan güclü yağışlardan sonra çay daşaraq gənc bir oğlanın həyatını itirməsinə gətirib çıxarıb.
Trend-in ANSA-ya istinadən verdiyi məlumata görə, oğlanın avtomobili su axınına ilişib qalıb və o, maşından çıxmağa müvəffəq olmayıb.
Emiliya-Romanya bölgəsində, o cümlədən 13 yaşayış məntəqəsində vəziyyət kritik olaraq qiymətləndirilir və 3 mindən çox insan təcili yardım xidmətləri tərəfindən təxliyə edilib. Bölgənin inzibati mərkəzi Boloniyada bir neçə saat ərzində 175 mm yağış yağıb ki, bu da çayların daşmasına və küçələrin su altında qalmasına səbəb olub. Əhaliyə evlərindən çıxmamaları və yuxarı mərtəbələrdə qalmaq barədə xəbərdarlıq edilib. Məktəblərin bağlandığı və ən yüksək hava xəbərdarlığının bazar ertəsinə qədər qüvvədə olacağı elan edilib.
Bu, son 1,5 il ərzində Emiliya-Romanyada baş verən dördüncü daşqındır. Ən sonuncu daşqın isə cəmi bir ay əvvəl qeydə alınmış və təcili tədbirlər tələb olunmuşdu.
İtaliyanın cənubunda da vəziyyət kritikdir. Siciliya adasında güclü yağışlar sürüşmə təhlükəsi yaradır və bəzi icmalar ciddi şəkildə zərər görüb.
Mütəxəssislər hava hadisələrinin getdikcə daha ekstremal xarakter almasını iqlim dəyişikliyi ilə əlaqələndirirlər.