Bakı. Trend:
BMT sisteminin səmərəliliyini və təsir gücünü yüksəltmək lazımdır.
Trend xəbər verir ki, bu barədə Çinin Xarici İşlər naziri Van İ Münxen Təhlükəsizlik Konfransında çıxışı zamanı bildirib.
O qeyd edib ki, ötən il beynəlxalq vəziyyət artan dəyişikliklər və qeyri-sabitliklə xarakterizə olunub, eyni zamanda güc hüququ və birtərəfli yanaşmalar geniş vüsət alıb.
“Tarixin axarını düzgün məcraya yönəltmək üçün qlobal idarəetməni islah etməli və təkmilləşdirməliyik. Qlobal idarəetmənin islahı və təkmilləşdirilməsi prosesində prioritet BMT sisteminin canlandırılmasıdır. BMT-nin yaradılması faşizmə qarşı dünya müharibəsində qələbənin mühüm nəticəsi olub. Bu, əvvəlki nəsillərin keçmiş əzabları dərindən dərk etdikdən sonra etdiyi tarixi seçimdir və xalqların bütün səylərini səfərbər edərək sülhə can atmasının təzahürüdür. Bu təməl dünya xalqlarının birgə səyləri ilə yaradılıb və onu möhkəmləndirmək və yeniləmək üçün tam məsuliyyət daşıyan da məhz onlardır; heç kimin onu dağıtmağa haqqı yoxdur”, – deyə o bildirib.
Van İ-nin sözlərinə görə, BMT indiki formada mükəmməl olmasa da, dünyada ən universal və nüfuzlu beynəlxalq hökumətlərarası təşkilat olaraq qalır.
“BMT platformasında hər bir ölkə, miqyasından və iqtisadi gücündən asılı olmayaraq, söz demək və müqəddəs səsvermə hüququna, həmçinin öhdəliklərə və bərabər hüquqlara malikdir. BMT olmadan dünya güclünün zəifi əzdiyi cəngəllik qanunlarına qayıdardı. Orta və kiçik ölkələrin bir çoxu mövcud olmaları və inkişafları üçün həyati əhəmiyyət daşıyan çoxtərəflilik təməllərini itirərdi”, – deyə nazir vurğulayıb.