...

İndiyədək 17 Mənzil Mülkiyyətçiləri Müştərək Cəmiyyəti qeydiyyata alınıb

Biznes və iqtisadiyyat xəbərləri Materials 18 Noyabr 2015 16:21 (UTC +04:00)
“Mənzil mülkiyyətçiləri müştərək cəmiyyətlərinin fəaliyyətinin təşkili: problemlər və perspektivlər” mövzusunda "dəyirmi masa" keçirilib.
İndiyədək 17 Mənzil Mülkiyyətçiləri Müştərək Cəmiyyəti qeydiyyata alınıb

Bakı. Trend:

Bu gün Bakı Biznes Mərkəzində İqtisadiyyat və Sənaye Nazirliyinin təşkilatçılığı ilə mənzil fondunun bazar iqtisadiyyatı prinsiplərinə uyğun idarə olunmasının təşkili, sahə mülkiyyətçilərinin idarəetmədə yaxından iştirakının təmin olunması, yeni yaradılan Mənzil Mülkiyyətçiləri Müştərək Cəmiyyətlərinin (MMMC) fəaliyyətinin dəstəklənməsi, eləcə də bu sahədə mövcud problemlərin müzakirəsi məqsədilə "Mənzil mülkiyyətçiləri müştərək cəmiyyətlərinin fəaliyyətinin təşkili: problemlər və perspektivlər" mövzusunda "dəyirmi masa" keçirilib.

Nazirliyin mətbuat xidmətindən Trend-ə verilən məlumata görə, tədbirdə İqtisadiyyat və Sənaye Nazirliyinin, beynəlxalq təşkilatların, aidiyyəti dövlət orqanlarının, bələdiyyələrin və çoxmənzilli binalarda yaradılan MMMC-lərin, həmçinin təşəbbüs qruplarının nümayəndələri iştirak ediblər.

İqtisadiyyat və Sənaye Nazirliyinin Mənzil-kommunal siyasəti şöbəsinin müdiri Nizami Qasımov ölkəmizdə həyata keçirilən mənzil-kommunal siyasəti, həyata keçirilən institusional islahatlar və bu sahənin inkişaf perspektivləri barədə məlumat verib. Diqqətə çatdırılıb ki, mənzil fondunun idarə olunması istiqamətində qanunvericiliyin beynəlxalq standartlara uyğunlaşdırılması istiqamətində mühüm işlər görülüb, 2009-cu ildə yeni Mənzil Məcəlləsi qəbul edilib. Məcəllə mənzil-kommunal təsərrüfatı sahəsində yeni münasibətlərin formalaşmasında, eləcə də mənzil fondunun idarə olunmasında mütərəqqi idarəetmə üsullarının tətbiqində əsas hüquqi baza rolunu oynayır. Bakı şəhərində çoxmənzilli binalarda sahə mülkiyyətçiləri tərəfindən yeni idarəetmə üsullarının tətbiqi ilə əlaqədar MMMC-lər yaradılıb, indiyədək 17 MMMC dövlət qeydiyyatına alınıb. Hazırda yeni üsulların tətbiqi, o cümlədən yeni MMMC-lərin yaradılması istiqamətində əlavə olaraq 20-dən artıq layihə üzrə işlər aparılır.

İqtisadiyyat və Sənaye Nazirliyinin sektor müdiri Arif Nəzərov MMMC-lərin yaradılmasında dövlət dəstəyi, Binəqədi rayon İcra Hakimiyyətinin şöbə müdiri Ramiz Göyüşov Binəqədi rayonunda MMMC-lərin təşkili barədə təqdimatlarla çıxış ediblər.

Tədbirdə iqtisadçı-ekspert Nüsrət İbrahimov, "Yasamal-2" MMMC-nin sədri Gülbaba Cavadov, "Xətai-3" MMMC-nin sədri Mehman Nağıyev və digərləri məruzələrlə çıxış ediblər.

Sonda tədbir iştirakçılarının sualları cavablandırılıb.

Məqalədə:
Xəbər lenti

Xəbər lenti