Azərbaycan, Lənkəran, 21 fevral / Trend , müxbir P.Əliyeva/ Azərbaycanın cənub bölgəsində baş verən qasırğanın nəticələrini aradan qaldırarkən fevralın 20-si axşam saatlarında bir nəfər həlak olub. Lənkəran rayon prokuroru Ramiz Nəbiyev cümə axşamı Trend a bildirib ki, rayon Elektrik Paylayıcı Şəbəkəsinin əməkdaşı 1966-cı il təvəllüdlü Şirvan Vəli oğlu Ağayev xidməti işi zamanı yüksək gərginliyə düşərək ölüb.
Azərbaycanın cənub, Yardımlı, Lerik və Lənkəran rayonlarında fevralın 20-nə keçən gecədən başlayan qasırğa nəticəsində rayonun elektrik və rabitə təsərrüfatına ciddi ziyan dəyib. Fövqəladə Hallar Nazirliyinin (FHN) Yardımlı rayon şöbəsinin rəisi Etibar Fərruxov çərşənbə günü Trend ə bildirib ki, güclü külək və qasırğa nəticəsində rayonda 75 elektrik dirəyi aşıb və 5 km uzunluğunda elektrik xətti sıradan çıxıb.
Ekologiya və Təbii Sərvətlər Nazirliyi (ETSN) Milli Hidrometeorologiya Departamentinin direktor müavini Umayra Tağıyeva çərşənbə axşamı Trend ə bildirmişdi ki, ölkə ərazisində qasırğa ilə müşayiət olunacaq güclü külək fevralın 21-dək davam edəcək.
Fərruxov deyib ki, elektrik təsərrüfatına dəyən ziyan nəticəsində Yardımlıda elektrik enerjisinin verilməsində fasilələr yaranıb. Onun sözlərinə görə, qasırğa rayonun 4 rabitə dirəyinı aşırdıb. Hazırda rayona dəyən ziyanın məbləği müəyyənləşdirilir.