Bakı. Fərid Zöhrabov - Trend:
Biləsuvar Rayon Polis Şöbəsinin əməkdaşlarının keçirdikləri növbəti əməliyyat-axtarış tədbirləri nəticəsində 15 kiloqramdan artıq güclü təsiredən xassəyə malik narkotik vasitə və psioxtrop maddə aşkarlanaraq götürülüb.
DİN Mətbuat Xidmətinin Lənkəran regional qrupundan Trend-ə verilən məlumata görə, Biləsuvar RPŞ-nin əməkdaşlarının daxil olmuş məlumat əsasında keçirdikləri əməliyyat-axtarış tədbirləri nəticəsində narkotik vasitələrin qanunsuz dövriyyəsində şübhəli bilinən, Biləsuvar rayonunun Zəhmətabad kənd sakini, əvvəllər məhkum olunmuş Cavid Əliyev saxlanılıb. Şəxsi axtarış zamanı ona məxsus idman çantasından ayrı-ayrı bağlamalarda ümumilikdə 11 kiloqram 630 qram heroin, 720 qram metamfetamin və 3 kiloqramdan artıq tiryək aşkarlanaraq götürülüb. Aparılan araşdırmalarla onun xaricdə yaşayan narkotacir tərəfindən narkokuryerliyə cəlb edildiyi müəyyən edilib. Belə ki, C.Əliyev narkotik vasitələri həmin şəxs vasitəsilə əldə etdiyini və onun deyəcəyi yerlərə çatdırmaqla satışını təşkil etməli olduğunu etiraf edib.
Faktla bağlı Biləsuvar RPŞ-də araşdırma aparılır.
