...

İtaliya mətbuatı: Ermənistanın son təxribatları Azərbaycanın strateji tərəfdaşı olan İtaliyanı narahat edir

Ermənistan-Azərbaycan münaqişəsi Materials 16 İyul 2020 12:12 (UTC +04:00)
İtaliya mətbuatı: Ermənistanın son təxribatları Azərbaycanın strateji tərəfdaşı olan İtaliyanı narahat edir

Bakı. Trend:

İtaliyanın tanınmış “L’Opinione” qəzetində jurnalist Domeniko Letizianın 12 iyul tarixindən başlayaraq Ermənistan-Azərbaycan sərhədi boyunca Ermənistanın həyata keçirdiyi təxribatlarına İtaliyanın hakim siyasi-ictimai dairələrinin və tanınmış siyasətçilərinin reaksiyası, İtaliyanın Ermənistan-Azərbaycan Dağlıq Qarabağ münaqişəsinin nizamlanmasına dair mövqeyi, eləcə də münaqişənin nizamlanmasının, o cümlədən son hərbi təxribatların qarşısının alınmasının İtaliyanın maraqları baxımından əhəmiyyətinə dair məqaləsi dərc olunub.

Trend-in məlumatına görə, müəllif məqaləsində Azərbaycanın Dağlıq Qarabağ bölgəsi və ətraf 7 rayonu olmaqla ölkəmizin beynəlxalq səviyyədə tanınmış ərazilərinin 20 faizinin Ermənistan silahlı qüvvələrinin hərbi işğalı altında olduğunu, Tovuz istiqamətində Ermənistan hərbi qüvvələrinin həyata keçirdiyi təxribatların Ermənistanın Azərbaycana qarşı təcavüzünün yeni dalğası olduğunu bildirir, son təxribatların gətirib çıxartdığı tələfatlara diqqəti çəkir və Prezident İlham Əliyevin Təhlükəsizlik Şurasının iclasında son hadisələrlə bağlı fikirlərinə istinad edir. Məqalədə Azərbaycan Prezidentinin Ermənistan hakimiyyətini riyakarlıqda ittiham edərək baş verənlərə görə tam məsuliyyəti erməni tərəfinin daşığını, Ermənistanın bir tərəfdən beynəlxalq ictimaiyyətə müraciət edərək Ermənistan-Azərbaycan qoşunlarının təmas xəttində atəşkəs rejiminin möhkəmləndirilməsi üçün kömək xahiş etdiyini, digər tərəfdən isə hərbi təxribatlar törədərək Azərbaycan ərazisinə basqın etmək, Azırbaycan mövqelərini zəbt etmək istədiyini, mülki əhalini, kəndlərimizi atəşə tutduğunu bildirdiyini vurğulayıb.

Məqalədə İtaliyanın ATƏT-in Minsk Qrupunun üzvü kimi həmişə münaqişənin siyasi həllini dəstəklədiyini, Prezident İlham Əliyevin İtaliyaya dövlət səfəri zamanı imzalanmış “Azərbaycan Respublikası ilə İtaliya Respublikası arasında Çoxşaxəli Strateji Tərəfdaşlığın Gücləndirilməsinə dair Birgə Bəyannamə”də tərəflərin bir-birinin müstəqilliyini, suverenliyini, ərazi bütövlüyünü və beynəlxalq səviyyədə tanınmış sərhədlərinə dəstəyini, dövlətlərarası münasibətlərdə təcavüz aktlarının yolverilməzliyini təsdiq etdiklərini, habelə həmin sənəddə İtaliyanın Ermənistan-Azərbaycan Dağlıq Qarabağ münaqişəsinin Helsinki Yekun Aktının təməl prinsipləri, xüsusilə suverenlik, ərazi bütövlüyü və beynəlxalq sərhədlərin toxunulmazlığı əsasında, BMT və ATƏT-in müvafiq sənəd və qərarlarında təsbit olunduğu kimi sülh yolu ilə nizamlanmasını dəstəklədiyinin ifadə olunduğu bildirir.

Müəllif məqaləsində, habelə Ermənistanın son təxribatlarının İtaliya hakim-siyasi dairələrində yaratdığı narahatlığa diqqəti çəkir, eləcə də münaqişənin həllinə münasibətdə İtaliya hökumətinin, parlamentinin üzvlərinin, tanınmış icimai-siyasi xadimlərinin verdikləri açıqlamalara yer verir. Bu xüsusda, müəllif İtaliya xarici işlər və beynəlxalq əməkdaşlıq naziri Luici Di Maionun öz azərbaycanlı həmkarına telefon zənginin İtaliyanın narahatlığından irəli gəldiyini bildirir, eləcə də Senatın Xarici əlaqələr daimi komissiyasının sədri, 5 Ulduz Hərəkatı partiyasından olan senator Vito Petroçelli, İtaliya Respublikasının Nazirlər Şurasının Parlamentlə Əlaqələr üzrə dövlət katibi, 5 Ulduz Hərəkatı partiyasından olan senator Canluka Kastaldi, İtaliyanın ATƏT Parlament Assambleyası yanında nümayəndə heyətinin sədri və Deputatlar Palatasının Xarici əlaqələr daimi komissiyasının sədr müavini, Liqa partiyasından deputat Paolo Qrimoldi, İtaliya Parlamentində Azərbaycanla Parlamentlərarası Dostluq Qrupunun sədri, Liqa partiyasından senator Stefano Luçidi, İtaliya Parlamentində Azərbaycanla Parlamentlərarası Dostluq Assosiasiyasının sədri, Liqa partiyasından deputat Rossana Boldi və İtaliya Senatının “İrəli İtaliya” partiyasından olan üzvü, İtaliya-Azərbaycan Parlamentlərarası Dostluq Assosiasiyasının sədr müavini, senator Maria Rizzotti, İtaliya Senatının “Yaşasın İtaliya” partiyasından olan üzvü, senator Mauro Maria Marino, Deputatlar Palatasının Xarici əlaqələr komissiyasının üzvü, “İrəli İtaliya” partiyasından olan deputat Osvaldo Napoli, İtaliyanın sabiq xarici işlər naziri, “Marco Pannella” Hüququn Aliliyi Qlobal Komitəsinin prezidenti Culio Terzinin İtaliya mətbuatına açıqlamalar verərək Ermənistan silahlı qüvvələrinin təxribatlarını və Azərbaycan ərazilərinin işğalını pislədiklərini, Azərbaycanın ərazi bütövlüyünə və beynəlxalq səviyyədə tanınmış sərhədlərinə hörmət edilməsinin və BMT Təhlükəsizlik Şurasının 1993-cü ildə qəbul olunmuş qətnamələrinin yerinə yetirilməsinin vacibliyini vurğuladıqlarını qeyd edir. Həmin şəxslərin öz açıqlamalarında silahlı qarşıdurmaların baş verdiyi Tovuz rayonu ərazisindən İtaliyaya da neft nəql edən Bakı-Tbilisi-Ceyhan neft kəmərinin və Cənub Qaz Dəhlizinin başlanğıcını təşkil etməsi baxımından maraq doğuran Cənubi Qafqaz boru kəmərinin keçdiyini vurğuladıqlarını bildirir.

Müəllif məqaləsində Ermənistan-Azərbaycan münaqişəsinin və Azərbaycan ərazilərinin işğalının Cənubi Qafqazda sabitliyə və təhlükəsizliyə başlıca təhdid olduğunu, beynəlxalq təşkilatlar tərəfindən çoxsaylı sənədlərin qəbul olunmasına baxmayaraq, Ermənistanın öz qoşunlarını işğal olunmuş ərazilərdən çıxartmaq əvəzinə öz hərbi aktlarını davam etdirdiyini qeyd edir. Yazıda karbohidrogen ehtiyatları, o cümlədən təbii qazla zəngin olan, Bakı-Tbilisi-Ceyhan neft kəməri və Cənub Qaz Dəhlizinin tərkib hissəsi olan və İtaliyanın Puliya regionuna qədər uzanan TAP boru kəmərinin təchizatçısı olan Azərbaycanın Avropa Birliyinin enerji təhlükəsizliyi strategiyasını həyata keçirməsi üçün əhəmiyyətindən bəhs olunur. Məqalədə Azərbaycanın İtaliyanın güclü iqtisadi və ticari əlaqələrə malik strateji tərəfdaşı və bölgədə əsas istinad nöqtəsi olduğu və münaqişənin yenidən alovlanmasının İtaliyanı və beynəlxalq ictimaiyyəti narahat etməli olduğu vurğulanır.

Məqalədə:
Xəbər lenti

Xəbər lenti