"Ağır şəraitdə, vaqonlarda, çadırlarda yaşamalarına baxmayaraq, azərbaycanlı qaçqın və məcburi köçkünlərində öz torpaqlarına qayıdacaqlarına inam böyükdür". Trend informasiya agentliyi xəbər verir ki, bunu Avropa Şurası parlament Assambleyasının (AŞ PA) Qaçqınlar üzrə alt komitəsinin sədri, isveçrəli deputat xanım Rut-Qabi Vermot-Manqold iyulun 4-də, "Hyatt Regency" mehmanxanasında "Cənubi Qafqazda köçkün düşmüş əhali" mövzusunda keçirilmiş seminardakı çıxışı zamanı bildirmişdir.
AŞ PA-nın Miqrasiya, Qaçqınlar və Əhali məsələləri komitəsinin Azərbaycan Respublikası Milli Məclisi ilə birgə təşkil etdiyi seminarda quruma üzv olan ölkələrin parlament nümayəndələri iştirak etmişlər.
Azərbaycanda səfərdə olduqları ötən iki gün müddətində qaçqın və məcburi köçkünlərin vəziyyəti ilə yaxından tanış olmaq məqsədilə çadır şəhərciklərinə səfərlər etdiklərini xatırladan xanım Vermot-Manqold, üstündən 15 il keçməsinə baxmayaraq həmin insanlarda doğma torpağa olan bağlılıq hissinə heyran qaldığını bildirmişdir.
Onun sözlərinə görə, lakin bu qayıdış heç də asan başa gəlməyəcəkdir. Bu proses baş verənədək qaçqın və məcburi köçkünlərin sosial vəziyyətlərinin yaxşılaşdırılması üçün beynəlxalq donor təşkilatları bu işə cəlb etmək lazımdır.
Hazırda ölkə vətəndaşlarından hər 1/8-nin qaçqın və məcburi köçkün vəziyyətində yaşadığını xatırladan AŞ PA-nın Monitorinq Komitəsinin üzvü Naira Şahtaxtinskaya onların sosial vəziyyətlərinin yaxşılaşdırılması istiqamətində dövlətin mühüm proqramlar qəbul etdiyini bildirmişdir.O, öz çıxışında Avropa Şurasını həmin proqramların icrasına dəstək verməyə çağırmışdır.
Ermənistanın apardığı işğalçılıq siyasəti nəticəsində Azərbaycanda 1 milyonadək qaçqın ordusunun yarandığını qeyd edən AŞ PA-dakı Azərbaycan parlament nümayəndə heyətinin rəhbəri Səməd Seyidov isə yayın gəlişi ilə çadır şəhərciklərində və vaqonlarda məskunlaşmış insanların vəziyyətinin dözülməz həddə çatdığını vurğulamışdır.
AŞ PA-nın Miqrasiya, Qaçqınlar və Əhali məsələləri komitəsinin Azərbaycan, Gürcüstan və Ermənistandakı qaçqın və məcburi köçkünlərin vəziyyətinə dair məruzəçisi, latviyalı deputat Boris Çileviç isə qaçqınları vəziyyətinin yaxşılaşdırılması, onların doğma torpaqlarına qayıtmaları məqsədilə ilk növbədə icmalar arasında inteqrasiya prosesinin gücləndirilməsinin, bu işə QHT-lərin cəlb olunmasının vacibliyini vurğulamışdır.
Seminarda çıxış edən baş nazirin müavini, "Qaçqınkom"un sədri Əli Həsənov isə BMT, ATƏT, AŞ-nın Ermənistanın Azərbaycana qarşı apardığı işğalçılıq siyasətini pisləyən bir sıra qərar və qətnamələr qəbul etməsinə baxmayaraq rəsmi İrəvanın bunlara heç bir məhəl qoymadığını, öz işğalçılıq siyasətini davam etdirdiyini bildirmişdir.
"Bütün beynəlxalq təşkilatlar Azərbaycan torpaqlarını erməni hərbi birləşmələrindən təmizlənməsi, işğalçı ordunun Azərbaycan torpaqlarından çıxarılması ilə bağlı qərar və qətnamələr qəbul etmişdir. Amma bu günədək onlardan heç biri yerinə yetirilmir.
Deyin, görək daha hansı beynəlxalq təşkilat qalmışdır ki, gedib bununla bağlı ona müraciət edək?",- deyə Əli Həsənov seminarın təşkilatçılarına xitabən soruşmuşdur.
Seminar mövzu ətrafında müzakirələrlə öz işini davam etdirmişdir. Seminarın sonunda qəbul ediləcək qətnamə AŞ PA-nın Miqrasiya, Qaçqınlar və Əhali məsələləri komitəsinin hesabatına daxil ediləcəkdir.
Xatırladaq ki, iyunun 5-də eyni məkanda AŞ PA-nın Monitorinq komitəsinin iclası keçiriləcəkdir.
