Azərbaycan, Bakı / Trend , müxbir İ.Əlizadə/ Azərbaycan Milli QHT Forumu iyunda qondarma Dağlıq Qarabağ Respublikasında keçiriləcək "prezident seçkiləri" ilə bağlı dünya ictimaiyyətinə bəyanat ünvanlayıb. Bu barədə cümə günün Milli QHT Forumunun prezidenti, millət vəkili Azay Quliyev məlumat verib.
425 QHT-nin imzaladığı müraciətdə qeyd olunub ki, dünya ictimaiyyəti və beynəlxalq aləm tərəfindən tanınmayan, dövlətçilik subyekti kimi qəbul edilməyən separatçı qurumun atdığı bütün addımlar kimi, bu seçkilər də öncədən etirazla qarşılanmalıdır: "Belə ki, artıq ABŞ Dövlət Departamenti, Avropa Şurası və digər beynəlxalq təşkilatlar həmin prezident seçkilərinin nəticələrini tanımayacaqları haqda müvafiq bəyanatlarla çıxış ediblər."
Müraciətdə deyilir ki, Azərbaycan dövlətinin siyasi nəzarətindən kənarda, Dağlıq Qarabağın azərbaycanlı icmasının iradəsini nəzərə almayan qeyri-qanuni seçkilərin keçirilməsi hüquqa zidd hərəkət kimi münaqişənin nizamlanmasına mənfi təsir göstərir, yerli və beynəlxalq qurumların bu yöndəki fəaliyyətinə zərbə vurur: "Keçirilməsi planlaşdırılan bu şeçkilərin qayəsi və məqsədi münaqişənin nizamlanması üzrə aparılan danışıqlarda Ermənistan rəhbərliyinin riyakarlıqla iddia etdiyi konstruktivlik mövqeyindən tamamilə uzaq olmasını bir daha sübut edir və bölgəyə sülhün gəlişini təxirə salır."
Milli QHT Forumu hesab edir ki, Ermənistan nə vaxta kimi bu cür seçki şouları düzənləyəcək və işğal etdiyi əraziləri azad etməkdən boyun qaçıracaq, o vaxta kimi Dağlıq Qarabağ münaqişəsi sülh yolu ilə öz həllini tapmayacaq. Bu isə bölgədə yenidən hərbi əməliyyatların başlanma ehtimalını artırır və hadisələrin bu istiqamətdə inkişafının məsuliyyəti isə birbaşa Ermənistan rəhbərliyinin və ictimaiyyətinin üzərinə düşür: "Buna görə də biz, QHT nümayəndələri ümid edirik ki, Ermənistanın bu kimi qanunsuz hərəkətlərinin qarşısını almaq üçün ATƏT-in Minsk qrupunun həmsədr ölkələri daha qətiyyətli olacaq və işğalçı dövlətin bu addımına lazımi qiymət verəcək."