İsrail, Qüds 21 fevral / Trend , müxbir R.Abdullayev, D.Xatınoğlı / İran rəhbərliyinin İsraili "yer üzündən silməsi"-nə dair bəyanatı real deyil, amma İsraili diplomatik xarakterli pereventiv tədbirlər görməyə məcbur edir. "Əsas təhlükə İsrailə deyil, İrana yönədilib"- deyə, Fransa politoloqu Hüseyn Lacəvərdi Trend ə bildirib.
İran İnqilab keşikçiləri Korpusunun (Sepah) sədri general Məhəmmədəli Cəfəri keçən həftə İsraili "xərçəng mənbəyi" adlandıraraq, onun tezliklə Livandakı "Hizbullah" təşkilatının əli ilə yer üzündən məhv olacağını demişdir. BBC-nin fevralın 19-da yaydığı məlumata əsasən, İranın Hərbi Qüvvələrinin qərargah rəisi general Həsən Firuzabadi də eyni bəyanatla çıxış edib. İran prezidenti Mahmud Əhmədinejad fevralın 14-də verdiyi bəyanatda Müğniyyənin ölümünün İsrailin məhv olunması ilə nəticələnəcəyini bildirb. İsrail XİN BMT-yə İranın təhdidləri ilə bağlı şikayət edib.
Fransada fəaliyyət göstərən İran Tədqiqatçılar Assosiyasının sədri Lacəvərdi cümə axşamı Parisdən telefonla Trend ə bildirib ki, İranın İsrailə təhdidlərinə baxmayaraq, əslində, hər hansı bir addım atması mümkun deyil. "İran hər gün dünyadan təcrid olunur və müttəfiqlərini itirir. Ölkə daxilində isə, hakimiyyət həddindən artıq zəifləyib. Hazırda real təhlükə İsraili yox, İranın özünü gözləyir"-deyə, Fransalı politoloq bildirib.
Lacəvərdinin fikrincə, "Hizbullah" təşkilatının liderlərindən olan İmad Müğniyyənin Suriyada qətli İsrailin deyil, Suriyanın işidir və bu addımı Amerikanın maraqlarına uyğun olaraq atıb. "İranın XİN sədri Mənuçehr Müttəki Suriya ilə birlikdə terror aktı ilə əlaqədar tədqiqat qrupu yaradılacağını bildirib, lakin, Suriya bu məsələni təkzib edib. İran ən böyük müttəfiqi Suriyani tədricən əldən verir, bu isə, İran üçün böyük təhlükədir" - deyə ekspert bildirib. Onun fikrincə, rəsmi Tehran müharibəyə böyük ehtiyac duyur və hakimiyyətin davamı müharibədən asılıdır. Lakin İsraili məhv edəcək qədər güclü deyil - deyə Lacavərdi əlavə edib.
İsrail XİN-nin rəsmi nümayəndəsi Eddi Şapiranın fikrincə, İranın nüvə təhlükəsi aktualdır və bu, nəinki İsrail, həm də Yaxın və Orta Şərq ölkələri, həmçinin, İranla bilavasitə sərhəddə yerləşən dövlətlər üçün böyük strateji təhlükə daşıyır. "Ayətullah rejiminin proqnozlaşdırılmayan siyasəti və İran prezidentinin BMT-yə üzv ölkələr barədə yolverilməz və bağışlanmaz mülahizələri İsraili diplomatik xarakterli qabaqlayıcı tədbirlər görməyə məcbur edir" - deyə Şapira cümə axşamı Trend ə bildirib.
Diplomatın sözlərinə görə, əsas təhlükə istənilən üsullarla nüvə silahı əldə etmək niyyətində olan Ayətullah rejimində gizlənir. Şapiranın fikrincə, İsraillə yanaşı, ərəb dünyasında da İranın niyyətinə etibar yoxdur və İranın nüvə proqramından hərbi məqsədlər üçün istifadə etməsinə dair narahatlıq mövcuddur.
"İran terrorizmi çox fəal şəkildə dəstəkləyən dövlətlərdən biri olaraq qalır. İran terroru beynəlxalq səviyyədə dəstəkləyir, Qəzzə zolağında "Həmas" terrorçularına himayədarlıq edir. İran Fələstin qruplaşmalarından döyüşçülərin hazırlanmasını, həmçinin, onların silah və pulla təchiz edilməsini davam etdirir. Dünyada İranın İraqa və Livanda həll edilməmiş siyasi vəziyyətə təsiri, həmçinin, "Hizbullah" terror qruplaşmasına dəstəyi məsələlrinə dair narahatlıq mövcuddur"- deyə İsrailin rəsmi nümayəndəsi əlavə edib.
Livan vətəndaşı olan İmad Müğniyyə fevralın 13-də Suriyada qətlə yetirilib. İran İsraili Müğniyyənin ölümündə təqsirli bildir. Rəsmi Təl Əviv bu ittihamı rədd edib. İran rəsmiləri bu terrordan sonra İsrail əleyhinə sərt bəyanat veriblər.
Müğniyyə dünyanın 42 ölkəsində terrorçuluq ittihamı ilə təqibdə olan şəxs olub.
