Ermənistanın yeni prezidenti Qarabağın köməkliyi ilə əhalinin diqqətini problemlərdən ayıracaq– britaniyalı ekspert

Böyük Britaniya, London, 01 mart / " müxbir G.Əhmədova/ Britaniyalı ekspert Robert Çensiner (Robert Chenciner) hesab edir ki, Ermənistanın yeni prezidenti Serj Sarkisyan iqtisadi problemlər və korrupsiyadan ölkə ictimaiyyətinin diqqətini yayındırmaq üçün Azərbaycanla Dağlıq Qarabağ ətrafında yaranan münaqişədən istifadə edəcək.

"Sarkisyan hökuməti, əhalini iqtisadiyyat və korrupsiya sahəsində olan daxili problemlərdən qismən ayırmaq üçün Dağlıq Qarabağ münaqişəsinin həlli yollarının axtarışlarına yönəldəcək" - deyə Trend a Oksford Universitetinin (University of Oxford) professoru Robert Çensiner bildirib.

Ermənistanda fevral ayının 19-da prezident seçkiləri keçirilib. Ölkənin Mərkəzi Seçki Komissiyasının yekun məlumatlarına görə, seçicilərin 862369 (52,82%) səsini toplayan Serj Sarkisyan Ermənistan prezidenti seçilib.

Oksford Universitetinin Qafqaz üzrə ekspertinin rəyinə görə, diqqətin münaqişənin həllinə cəmləşdirilməsi Sarkisyan hökumətinə TransQafqaz layihələrinin reallaşdırılmasının stabilləşdirilməsi və böyük iqtisadi üstünlüyə malik olmaq üçün də lazımdır.

Professor Çensiner hesab edir ki, Rusiya müxalifətin seçkilərin nəticələrindən narazı qaldığı Ermənistanda vəziyyətin pisləşməsinə yol verməyəcək. Onun sözlərinə görə, Rusiya ATƏT-in Minsk Qrupunda uzun müddət aparıcı erməniyönlü rol oynayıb. O, bildirib ki, Ermənistan daxilində vəziyyətin pisləşməsi Rusiya və Ermənistanın siyasi və hərbi münasibətləridə vəziyyəti öz maraqları üçün istifadə edən Azərbaycanla bağlı təhlükəni artıra bilərdi.

"Rusiya hərbi bazalarını yerləşdirdiyi Ermənistanda geniş kommersiya maraqlarına malikdir. Buna görə, stabilliyin dəstəklənməsi Rusiyanın maraqlarındadır" - deyə britaniyalı ekspert vurğulayıb.

Çensinerin sözlərinə görə, hazırda Ermənistan "məxməri inqilaba" hazır deyil. "2005-ci ilin may ayında Rusiyanın Milli Strateji İnstitutunun rəhbəri Stanislav Belkovski güman edirdi ki, Qazaxıstan, Özbəkistan və Tacikistanla yanaşı, Ermənistan da "məxməri inqilab" üçün ən "yetişmiş" ölkələr siyahısındadır. Lakin görünür, Ermənistan 2012-ci ildə keçiriləcək növbəti parlament seçkilərini gözləməli olacaq" - deyə Çensiner əlavə edib.

Çensiner hesab edir ki, Kosovonun müstəqilliyinin beynəlxalq ictimaiyyət tərəfindən tanınması nəzəri cəhətdən Dağlıq Qarabağ münaqişəsinin üçün presedent ola bilməz. "Dağlıq Qarabağ Şimali Kipr modelinə yaxındır. Dağlıq Qarabağın Azərbaycandan kənarda statusunun gələcəkdə dəyişməsi böyük effektə malik olmazdı. Kosovo arqumenti presedent olmaq üçün tam müəyyən olunmayıb. Kosovonun müstəqilliyi geniş beynəlxalq tanınmaya malikdir və sülhə zəmanət vermək üçün NATO hərbi kontingenti mövcuddur" - deyə o bildioib.

İki Cənubi Qafqaz ölkəsiarasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının 20%-i, yəni Dağlıq Qarabağ ərazisi və bu əraziyə bitişik 7 rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə, hələ ki nəticəsiz, sülh danışıqları aparılır.