Azərbaycan, Bakı, 31 mart / Trend ", müxbir Q.Cəbiyev/ Eks-spiker, ABŞ-da mühacir həyatı yaşayan Rəsul Quliyevin lideri olduğu Açıq Cəmiyyət Partiyası (ACP) hesab edir ki, müxalifətin prezident seçkisini boykot etmək üçün gücü yetərli deyil. "İndiki situasiya davam edərsə, hər hansı müxalifət partiyası və ya bütövlükdə müxalifət düşərgəsi seçkini boykot edə bilməyəcək. Çünki müxalifətin bunun üçün gücü yetərli deyil", bazar ertəsi Trend a ACP sədri Akif Şahbazov bildirib.
Azərbaycanda prezident seçkisi oktyabrda keçiriləcək. Müsavat, Demokrat partiyaları seçkidə iştirakla bağlı qərar versə də, üç müxalifət -Xalq Cəbhəsi, Liberal, Vətəndaş və İnkişaf partiyalarını özündə birləşdirən "Azadlıq" bloku seçkini boykot etmək niyyətindədir.
Şahbazov hesab edir ki, Azərbaycanın müxalifət düşərgəsində olan qüvvələrin boykot addımını gerçəkləşdirməyə belə gücü qalmayıb. Onun sözlərinə görə, seçkini yalnız xalq boykot edə bilər. Hər hansı partiyanın seçkini boykot etməsi effektsizdir.
Şahbazov əlavə edib ki, ACP-nin əsas məqsədi Quliyevin Azərbaycana dönməsinə nail olmaqdır. O, ACP-nin başqa bir müxalifət namizədini dəstəkləmək niyyəti olmadığını deyib. Kiməsə siyasi dəstək vermək uğrunda mübarizə aparmırıq və bu barədə düşünmürük.
Quliyevin tərəfdarları ötən ilə kimi Azərbaycan Demokrat Partiyasında (ADP) siyasi fəaliyyət göstəriblər. ADP ötən ilin yanvarındə iqtidara qarşı radikal müxalif mövqedən imtina edib və hakimiyyətlə dialoq qurub. Buna etiraz olaraq Quliyev və tərəfdarları ADP-dən imtina edərək özlərinin Açıq Cəmiyyət Pariyasını (ACP) yaradıblar.