Azərbaycan, Bakı, 17 aprel / Trend , müxbir S.Ağayeva/ Bu gün Kiyevdə Qara dəniz regionunda Avropa İttifaqı siyasətinin tətbiq edilməsi məsələsi müzakirə olunur. Müzakirə Qara Dəniz İqtisadi Əməkdaşlıq Təşkilatı xarici işlər nazirləri Şurasının (QİƏT XİNŞ) iclası üzrə aparılır. Bu barədə Azərbaycanın Ukraynadakı səfirliyindən məlumat verilib.
QİƏT ölkələrinin XİN başçıları nəqliyyat, energetika, mütəşəkkil cinayətkarlıqla mübarizə sahələrində əməkdaşlıq və digər məsələləri müzakirə edirlər. Səfirlikdən bildiriblər ki, Təşkilat fəaliyyətinin səmərəliliyinin yüksəldilməsi istiqamətində qərarların qəbul olunması gözlənilir.
Şuranın iclasında həmçinin Ukraynanın QİƏT-də sədrliyinə yekun vurulacaq və sədrlik növbəti 6 ay müddətinə - apreldən sentyabra qədər Albaniyaya veriləcək.
Tədbirdə QİƏT, Beynəlxalq Qara Dəniz Araşdırmalar Mərkəzi, Qara Dəniz Ticarət və İnkişaf Bankının rəhbərlikləri, QİƏT-in işgüzar Şurasının Baş katibi və başqaları iştirak edirlər. Azərbaycan xarici işlər nazirinin müavini Mahmd Məmmədquliyevin rəhbərlik etdiyi nümayəndə heyəti ilə təmsil olunur.
QİƏT-ə Azərbaycan, Albaniya, Gürcüstan, Moldova, Rusiya, Rumıniya, Yunanıstan, Bolqarıstan, Serbiya, Türkiyə, Ukrayna və Ermənistan daxildir.
