Azərbaycan, Bakı, 12 may / Trend , müxbir E.Babayev/ Azərbaycanın müxalifət partiyaları Seçki Məcəlləsinə son əlavə və dəyişikliklərə etiraz edir. "Məcəlləyə dəyişikliklər beynəlxalq öhdəliklərə tam ziddir" bazar eretəsi Trend -a Azərbaycanın müxalif Demokrat Partiyasının (ADP) prezidentliyə namizədi, təşkilatın sədri Sərdar Cəlaloğlu bildirib.
Azərbaycanda prezident seçkisi oktyabrın 15-də keçiriləcək. Seçki və səsvermə prosesinin təkmilləşdirilməsi üçün, Venesiya Komissiyası ilə Azərbaycan hökumətinin birgə müzakirələri nəticəsində, Seçki Məcəlləsinə əlavə və dəyişikliklər edilib.
Dəyişikliklərə əsasən, prezidentliyə namizədlərin təbliğatı üçün Seçki Fondunun məblği 10 milyon manata qədər artırılıb. Millət vəkilliyinə namizədlər üçün isə Seçki Fondunun miqdarı 500 min manat olacaq.
Azərbaycanın Seçki Məcəlləsinin əvvvəlki variantının 191-ci maddəsinə əsasən, dövlət büdcəsindən prezidentliyə namizədlərin seçki kampaniyasına maliyyə vəsaiti ayrılır və bu məbləğ şərti maliyyə vahidinin bir milyon mislindən çox olmamalıdır. Səslərin 3 faizindən azını toplayan namizədlər həmin məbləği sonra dövlət büdcəsinə geri qaytarmalıdırlar.
Azərbaycanda şərti maliyyə vahidinin (1,1 manat) bir milyon misli - 1, 1 mln. manat edir.
Millət vəkillərinə isə, şərti maliyyə vahidinin 75 min misli - 82,5 min manat ayrılırdı.
Məcəlləyə əlavə və dəyişikləri nəzərdə tutan layihədə seçki komissiyalarının tərkibinin dəyişməsi yer almayıb. Bundan başqa, dövlət leleviziyasında və rəsmi mətbuat orqanlarında seçki təbliğatının aparılması qadağan olunub, seçki kampaniyasına və seçki təşviqatına ayrılan müddət azaldılıb. Bundan başqa, seçici siyahılarında adları olmayan vətəndaşlar məhkəməyə müraciət etməyəcəklər və şəxsiyyət vəsiqələrini göstərməklə seçkidə iştirak edə biləcəklər.
Üç müxalifət partiyasını (Xalq Cəbhəsi, Liberal, Vətəndaş və İnkişaf) təmsil edən "Azadlıq" bloku da son dəyişiklikləri dəstəkləmir. Vətəndaş və İnkişaf Partiyasının sədri Əli Əliyev bazar ertəsi Trend -a bildirib ki, layihəyə dəyişikliklər məhdudiyyətləri daha da artımağa xidmət edir. "Seçki təşviqatının müddəti 60 gündən 21 günə endirilir. 21 günə Azərbaycan şəraitində təşviqat aparmaq mümkün deyil"- deyən Əliyev vurğulayıb ki, müxalifətin dövlət televiziyası və mətbuatına çıxışının qarşısının alınması isə müxalifətin imkanlarını məhdudlaşdırmaq məqsədi güdür.
Prezident seçkilərində iştirak edəcəyini açıqlayan politoloq Eldar Namazov isə Trend -a bildirib ki, dəyişikliklər ölkədə mövcud olan qeyri-bərabər mübarizə şəratini daha da artırır. "Hakimiyyət təmsilçiləri seçki kampaniyasına və təşviqatına ayrılan müddətin azaldılmasını dünya praktikası ilə izah edirlər. Ancaq Azərbaycan müxalifətinə digər ölkələrdən fərqli olaraq ilboyu məhdudiyyətlər tətbiq olunur. Digər ölkələrdə müxalifət seçki olmadıqda belə televiziyaya çıxa bilir"- deyən Namazov qeyd edib ki, dəyişikliklərin müxalifətin imkanlarını məhdudlaşdırmasına baxmayaraq, seçkidə iştirak etmək lazımdır. Çünki hakimiyyətin Seçki Məcəlləsi ilə bağlı mövqeyi onların seçkilərin nəticələrindən heç də arxayın olmadığını büruzə verir. "Hakimiyyətin Seçki Məcəlləsi ilə bağlı mövqeyi təxribat xarakterlidir. İstəyirlər ki, müxalifətdən real namizədlər seçkiyə getməsin. Müxalifət bu təxribata getməməlidir" - deyə o qeyd edib.
Hakim Yeni Azərbaycan Partiyası isə müxalifətin iddialarını əsassız sayır. YAP icra katibinin müavini, millət vəkili Mübariz Qurbanlı Trend -ə deyib ki, dəyişikliklər dünya praktikasına əsaslanıb və Avropa Şurasının Venesiya Komissiyası ilə razılaşdırılıb.
Müsavat Partiyasının Mərkəzi İcra Aparatının rəhbəri Arif Hacılı Trend -a bildirib ki, partiya bu dəyişiklikləri qəbul etmir. Onun sözlərinə görə, müxalifətin imkanlarını məhdudlaşdırmağa xidmət edən məcəlləyə dəyişikliklərlə bağlı Müsavat Partiyası beynəlxalq qurumlara müraciət edəcək.
Məqalə müəllifi ilə əlaqə ünvanı: [email protected]