Azərbaycan, Bakı, 13 may / " müxbir S.Ağayeva / Azərbaycan və Rusiya dövlətləri arasında sərhədlərin razılaşdırılmamış sahə hissələri, sərhədlərin delimitasiya və demarkasiyası ikitərəfli komissiya tərəfindən çərşənbə günü Bakıda müzakirə ediləcək.
Danışıqlar Rusiyanın xarici işlər nazirinin müavini Qriqori Karasin və onun azərbaycanlı həmkarı Xələf Xələfovun rəhbərliyi altında keçəcək.
Görüşdə normativ-hüquqi sənədlər və kartoqrafik materiallar qiymətləndiriləcək. Həmçinin, "Azərbaycan Respublikası və Rusya Federasiyası arasında dövlət sərhədi" müqavilə layihəsi haqqında fikir mübadiləsi aparılacaq.
Rusiyanın Azərbaycandaki səfiri Vasili İstratovun jurnalistlərə verdiyi məlumata görə, iki ölkə arasında üç razılaşdırılmamış sahə var. Sözügedən üç sahənin birində üç dövlətin sərhədləri qovuşur - Azərbaycan, Rusiya və Gürcüstan, digər iki sahə Samur çayının aşağısından keçir.
"Üç dövlətin sərhədlərinin qovuşduğu sahə ilə bağlı problemlər, demək olar, həll olunub və yaxın vaxtda konkret qərar qəbul etmək olar. Fikrimcə, Rusiya və Azərbaycan Samur çayı körpüsündən keçən sahə ilə bağlı da qarşılıqlı razılaşdırılmış qərarlar qəbul edə bilər. Dənizə bitişik sahə bəzi problemlər yaradır. Hesab edirəm ki, bu məsələnin də həlli mümkündür", - səfir əlavə edib. Onun fikrincə, tərəflər arasında qərarların tez qəbul olunması ekspertlərin intensiv işləməsindən asılıdır.
Azərbaycan və Rusiya Xarici İşlər Nazirliklərinin sonuncu
məsləhətləşmələri yanvarın sonunda Moskvada keçirilib. Görüşdə Azərbaycanı xarici işlər nazirinin müavini Xələf Xələfovun rəhbərlik etdiyi nümayəndə heyəti təmsil edib.
Müəlliflə əlaqə saxlamaq üçün elektron ünvan: [email protected]
