Fransa, Strasburq, 22 may / Trend , müxbir A.Məhərrəmli/ Azərbaycan Milli Məclisinin sədri Oqtay Əsədov ASPA sədri Luiz Maria de Puç və Aqo qrupunun yeni sədri, Rumıniyanın Avropa Şurası yanında daimi nümayəndəsi Stelyan Stoyan (Stelian Stoian) ilə Azərbaycanla Avropa Şurası arasında əməkdaşlığın bugünkü vəziyyətini müzakirə edəcək. Bu barədə Trend -a Azərbaycanın Avropa Şurası yanında Daimi Nümayəndəliyindən məlumat verilib.
Mayın 22-23-də Strasburqda Avropa Şurasına üzv ölkələrin parlament sədrlərinin növbəti konfransı keçiriləcək. Konfransda iştirak edən Azərbaycan parlamentinin spikeri bu toplantı çərçivəsində ASPA-nın sədri və Avropa Şurasının Aqo Monitorinq Qrupunun yeni sədri ilə görüş keçirəcək. Görüslərdə Azərbaycan-Avropa Şurası münasibətləri, rəsmi Bakı ilə Avropa Şurasının strukturları arasında mövcud əməkdaşlıq barədə müzakirələr aparılacaq.
Spikerlərin konfransında isə AŞPA yanında müşahidəçi statusu olan dövlətlərin parlament sədrləri, beynəlxalq təşkilatların - Avropa Parlamenti və ATƏT Parlament Assambleyasının sədrləri də iştirak edəcək.
Konfrans çərçivəsində Avropada prioritet sayılan iki əsas məsələ müzakirə olunacaq - vətəndaş cəmiyyətinin ölkələrin siyasi həyatında daha fəal iştirakını təmin etmək üçün yollar axtarılması və dövlətlərin gündəlik siyasi fəaliyyətlərinin demokratiya, insan hüquqları, qanunun aliliyi kimi dəyərlərə əsaslanması.
Bu konfrans AŞPA tərəfindən hər iki ildən bir təşkil olunur.
Məqalə müəllifi ilə əlaqə saxlamaq üçün elektron ünvan [email protected]
