Azərbaycan, Bakı, 29 may / Trend , müxbir A. Qasımova/ GUAM-ın sülhməramlı batalyonunun yaradılmasına dair məsələ hazırda ekspertlər səviyyəsində ilkin müzakirə mərhələsindədir və bu məsələyə prezident sammitində baxılması hələ tezdir. Bu barədə cümə axşamı Trend -a müsahibəsində Ukrayna prezidenti Viktor Yuşenko bildirib.
"Demokratiya və iqtisadi inkişaf uğrunda təşkilat - GUAM-ın Tbilisidə keçiriləcək növbəti sammitində Azərbaycanın GUAM-a sədrliyinin nəticələrinə dair məsələyə və gələn ilin fəaliyyət proqramına mütləq baxılacaq. Bu kontekstdə GUAM-ın gələcək fəaliyyətinə və təşkilatın dünyada nüfuzunun artmasına Azərbaycanın verdiyi əhəmiyyətli töhfəni xüsusi qeyd etmək istərdim" - deyə Yuşenko bildirib.
Ukrayna prezidentinin sözlərinə görə, sammitin gündəliyi qarşısında duran əsas məsələlər Avropanın enerji təhlükəsizliyinin təchiz edilməsində GUAM-ın iştirakı ilə bağlı iqtisadiyyat sahəsində birgə layihələrin reallaşdırılma perspektivləri və GUAM-a üzv ölkələrin tranzit potensialından istifadə səmərəliliyinin yüksəldilməsi ilə bağlıdır. "Üzv dövlətlərin mütəşəkkil cinayətkarlıq və qaçaqmalçılıqla mübarizə sahələrində, humanitar sahədə qarşılıqlı fəaliyyət üzrə əməkdaşlığının davam etdirilməsi problematikası da diqqətdən kənarda qalmayacaq", - deyə prezident bildirib.
GUAM formatı 1997-ci ildə Strasburqda Avropa İttifaqı dövlət başçılarının sammiti zamanı postsovet dövlətləri tərəfindən yaradılıb. 1999-cu ildə bu formata Özbəkistan daxil olsa da, dörd ildən sonra təşkilatı tərk edib. 2006-cı ildə Kiyevdə ilk sammit zamanı GUAM-ın beynəlxalq təşkilat və "Demokratiya və iqtisadi inkişaf uğrunda təşkilat - GUAM" kimi elan olunması haqda qərar qəbul olunub.
GUAM-ın Tbilisidə keçiriləcək sammiti təxminən 1-2 iyul tarixləri üçün nəzərdə tutulub.