Azərbaycan, Bakı, 25 iyun/ Trend , müxbir E.Babayev / Bu gün Səbail rayon məhkəməsində Müsavat Partiyasının Bakı Şəhər İcra Hakimiyyətinə qarşı iddiası ilə bağlı qərar çıxarılıb. Vəkil Tofiq Yaqublunun çərşənbə günü Trend -a verdiyi məlumata görə, hakim Famil Nəsibov Müsavatın iddiasının rədd olunduğunu elan edib.
Trend -un arayışı: Müsavatın iddiasında Bakı meriyasının partiyanın mayın 4-də keçirmək istədiyi mitinqə müvafiq yer ayrılmaması ilə bağlı qərarının qanunsuz sayılaraq ləğvi tələb olunurdu. Müsavat mayın 4-nə və 18-nə planlaşdırdığı iki mitinqi təxirə salıb. Buna Bakı meriyasının aksiyaçıları Bibiheybət qəsəbəsindəki stadiona göndərmək istəməsi olub. Partiya mitinqə Ukrayna meydanı, keçmiş "Qələbə" kinoteatrının qarşısı, "Nərimanov" metrostansiyasının ətrafı, Füzuli meydanı və ya Təbriz" (keçmiş "Sevinc") kinoteatrının qarşısındakı ərazilərdən birinin ayrılmasını istəyirdi.
Yaqublu bildirib ki, Müsavat Partiyası növbəti məhkəmə instansiyasına müraciət edəcək. "Biz onsuz da yerli məhkəmə instansiylarından heç nə gözləmirik. Ona görə də məsələnin Avropa Məhkəməsinə qədər gedib çıxmasına çalışacağıq", - deyə o bildirib.
Məqalə müəllifi ilə əlaqə ünvanı: [email protected]
