Azərbaycan, Bakı, 15 avqust / Trend , müxbir S.İlhamqızı/ Türkiyənin Gürcüstanda münaqişənin aradan qaldırılması üçün göstərdiyi təşəbbüsləri onun Qafqazdakı maraqlarının təhlükə altında olması və rəsmi Ankaranın bölgədə rolunu gücləndirmək niyyətindən irəli gəlir.
"Türkiyənin bu cəhdləri onun üçün böyük strateji əhəmiyyəti olan layihələrin təhlükə altında qalmaması üçündür" - deyə "Türksam" Beynəlxalq Əlaqələr və Strateji Araşdırmalar Mərkəzinin başqanı Sinan Oqan Trend - a bildirib.
Türkiyənin baş naziri Rəcəb Tayyib Ərdoğan Gürcüstanda baş verən münaqişənin dinc yolla nizamlanması məsələsini müzakirə etmək üçün dünən Moskva və Tbilisidə olub, Rusiya prezidenti Dmitriy Medvedev və baş naziri Vladimir Putinlə, Gürcüstan prezidenti Mixail Saakaşvili ilə danışıqlar aparıb. Ərdoğan tərəfləri sülhə çağırır və Qafqaz ölkələrindən ibarət "Sabitlik Paktı" platformasının yaradılmasını təklif edir.
Cənubi Osetiya ilə Gürcüstan arasında münaqişə və Rusiyanın da buna müdaxiləsi Gürcüstanın ərazi bütövlüyünü, sabitliyini təhlükə altına qoyduğundan, Bakı-Tbilisi - Ceyhan, Bakı -Tbilisi - Ərzurum, Bakı -Tbilisi - Qars kimi strateji əhəmiyyətli layihələr də təhlükə altında qalır. Türkiyə üçün çox böyük əhəmiyyət daşıyan bu layihələrin təhlükəsizliyini qorumaq zərurəti rəsmi Ankaranı münaqişəli tərəflər arasında vasitəçilik təşəbbüslərinə vadar edir.
Türkiyəli ekspertin fikrincə, rəsmi Ankaranın təşəbbüsləri Türkiyənin bölgədə rolunu gücləndirmək məqsədi güdür.
"Çünki Gürcüstanda baş verən münaqişə bölgədə Türkiyənin rolunu azaltmış, Rusiyanın rolunu isə, əhəmiyyətli dərəcədə artırmışdı. Türkiyə Qafqaz bölgəsində özünün yeni rolunu qazanmaq üçün bu cəhdləri göstərir" - deyə Oqan bildirib.
Rusiya İslam Komitəsinin sədri Heydər Camal da hesab edir ki, Türkiyənin fəallığı onun böldəgə nüfuzunu və rolunu artırmaq məqsədi güdür.
"Qafqaz hər zaman Türkiyə üçün strateji əhəmiyyətli bölgə olub və Türkiyə indi də sürətli şəkildə öz mövqelərini gücləndirməyə çalışır" - deyə Heydər Camal Trend -a bildirib.
Gürcüstan avqustun səkkizində öz ərazi bütövlüyünü bərpa etmək üçün Cənubi Osetiyada hərbi əməliyyatlara başlayıb. Bundan sonra Rusiya Gürcüstan ərazisinə zərbərələr endirib. Avqustun 12 - də Rusiya və Gürcüstan ayrı - ayrılıqda Fransa prezidenti Nikolya Sarkazinin təqdim etdiyi atəşkəs sazişini imzalayıblar.
Qısamüddətli münaqişqə dövründə Türkiyə prezidenti Abdullah Gül Rusiya və Gürcüstan prezidentləri ilə telefon əlaqəsi saxlayıb və tərəfləri sülhə çağırıb.
"Bölgədə sabitlik yaradılması və Qafqaz ölkələrinin bir araya gətirilməsi cəhdləri həm də ABŞ -ı operator dövlət kimi bu bölgədən sıxışdırıb çıxarmaq məqsədi güdür" - deyə, Camal bildiririb.
Məqalə müəllifi ilə əlaqə saxlamaq üçün elektron ünvan [email protected]
