Azərbaycan, Bakı, 13 noyabr/ Trend , müxbir A.Hüseynbala/ Azərbaycanın siyasi təşkilatları İranda yaşayan soydaşlarımıza qarşı repressiyaların çoxalması ilə bağlı beynəlxalq təşkilatlara müraciət hazırlayırlar.
"Biz indi repressiyalarla bağlı faktları toplayırıq. Məsələnin beynəlxalq səviyyədə qaldırılmasına ciddi ehtiyac var", - cümə axşamı Trend -a "Güney Azərbaycan" Beynəlxalq Forumunun Əlaqələndirmə Şurasının rəhbəri, müxalif Azərbaycan Milli İstiqlal Partiyasının lideri Etibar Məmmədov bildirib.
Trend -ın arayışı: Güney Azərbaycanda 35 milyona yaxın soydaşımız yaşayır. Son zamanlar İran hakimiyyət orqanlarının soydaşlarımıza qarşı apardığı repressiyalar, müxtəlif müddətlərə həbsxanalara salınanların işgəncələrə məruz qalması faktları çoxalıb.
Azərbaycanın müxalif partiyalarının birləşdiyi Demokratiya Uğrunda İttifaq (DUİ) ötən həftə İranın Azərbaycandakı səfirliyinə repressiyarla bağlı açıqlama verilməsi üçün müraciət edib. Müraciətə cavab verilməsə, DUİ İranın Azərbaycandakı səfirliyi qarşısında piket keçirmək niyyətindədir.
Onun sözlərinə görə, Bakıda hər hansı etiraz aksiyası keçirməkdənsə, Güney Azərbaycandakı repressiyalara beynəlxalq ictimaiyyətin diqqətini cəlb etmək daha vacibdir.
"Biz repressiyalarla bağlı sənəd hazırlayırıq. İran hakimiyyətinin qanunsuzluqlarının ayrı-ayrı ölkə parlamentlərində müzakirə olunması üçün tədbirlər görülür", - Məmmədov deyib.
"Güney Azərbaycandakı soydaşlarımıza qarşı İran hakimiyyətinin həyata keçirdiyi qanunsuzluqların qarşını bir neçə təşkilatın fəaliyyəti, eləcə də hər hansı tədbirlə almaq mümkün deyil", - cümə axşamı Trend -a Bütöv Azərbaycan Birliyi (BAB) Mərkəzi Şurasının sədri Aqil Səmədbəyli bildirib.
Onun sözlərinə görə, Güney Azərbaycanda baş verən proseslərə bütün millətin problemi kimi yanaşmaq lazımdır.
"Bu məsələ ilə bağlı Azərbaycan hökuməti reaksiyasını bildirməlidir. Güney Azərbaycanda yaşayan soydaşlarımıza qarşı aparılan repressiyalara, işgəncələrə dövlət səviyyəsində rəsmi reaksiya verilərsə, İran hakimiyyəti də bundan nəticə çıxara bilər", - BAB rəsmisi deyib.
Səmədbəylinin fikrincə, BAB hər hansı tədbir keçirib, bəyanat versə belə, İran dövləti bunu ciddi qarşılamayacaq. "Xarici Ölkələrdə Yaşayan Azərbaycanlılarla İş üzrə Dövlət Komitəsi də Güney Azərbaycanda soydaşlarımıza qarşı repressiyalara etirazını bildirməlidir. Bu addım atılarsa, işgəncələrin qarşısı alına bilər", - BAB Mərkəzi Şurasının rəhbəri vurğulayıb.
Məqalə müəllifi ilə əlaqə ünvanı: [email protected]