London İqtisadi və Siyasi Elmlər Məktəbinin Yunanıstan Rəsədxanasının Baş elmi əməkdaşı Ceyms Kerr-Lindsey, xüsusi olaraq Trend üçün
Yunanıstandakı hadisələr bir neçə amillə izah edilir. Onlardan hər biri ayrı-ayrı insan qruplarının rəftarını aydınlaşdırır. Anarxistlər, sadəcə, hakimiyyətin əleyhinə çıxış etsələr də, gənclər arasında işsizlik və perspektivlərin yoxluğu, şübhəsiz ki, iğtişaşların əsas amillərindən biridir.
Yunanıstanda cəmiyyətin iqtisadi islahatlardan narazılığı geniş yayılıb ki, bu da sollar üçün motivasiya amilidir. Ölkədə həm ən yüksək hökumət səviyyəsində, həm də ölkənin gündəlik həyatında korrupsiyanın yayılması onları son dərəcədə hiddətləndirir.
Hökumətin istefaya gedib-getməyəcəyini demək çətindir. Əlbəttə, hakimiyytdə qalmağın çətin olacağı təəssüratı var. Yunanıstanın gələcək siyasi həyatının müxtəlif perspektivləri, o cümlədən yeni seçkilər və ya hakimiyyətə milli birlik hökumətinin gəlməsi nəzərdən keçirilib. Problem ondan ibarətdir ki, hər bir tərəfə münasib olacaq göstəricini müəyyənlənləşdirmək son dərcədə çətindir.
Bu hadisələrin arxasında kimin dayanmasını müəyyən etmək baxımından, problem heç bir konkret qrup və ya təşkilatın olmamasından ibarətdir. Bizim Yunanıstanda gördüklərimizi ideal qasırğa adlandırmaq olar. Etirazlar cəmiyyətin tamamilə müxtəlif təbəqələrini birləşdirdi: narazı gəncləri, həmkarlar ittifaqlarını və orta sinfi. Atışma çox illər ərzində saxlanılan nifrətin əl-qolunu açdı.
Hökumətin hərəkətlərinə dair çoxları iddia edirdilər ki, o, etirazlara çox yumşaq reaksiya göstərdi və polislər daha sərt tədbirlər görməliydilər. Anarxistlərin fəaliyyətinin qarşısı vaxtında alınmadığı üçün, vəziyyət nəzarətdən çıxdı.
Vəziyyətin sabitləşməsinə gəldikdə isə, çox ehtimal ki, etirazlar sonda sıfıra enəcək. Lakin əsas amillər qüvvədə qalacaq. Vəziyyətin düzəldilməsi üçün Yunanıstanın iqtisadi və siyasi həyatında böyük islahatlar lazımdır. Hər kəs bu sistemin effektli olacağını qəbul etsə də,heç kəs onun qurulması üçün sərt qərarlar qəbul etmək istəmir. Bu baxımdan, ortamüddətli perspektivdə ölkədə vəziyyətin necə yaxşılaşacağını anlamaq çətindir.
Müəllifin rəyi Trend İnformasiya Agentliyi redaksiyasının rəyi ilə üst - üstə düşməyə bilər.