Azərbaycan, Bakı, 16 fevral / Trend , müxbir K.Zərbalıyeva/ Ədliyyə Nazirliyinin Penitensiar Xidmətinin Mühafizə Alayının 3 bölüyünün rəhbəri tutduqları vəzifədən azad olunub.
Ədliyyə Nazirliyinin Cəzaların İcrası Müfəttişliyinin rəisi Malik Ələkbərov bazar ertəsi Trend -a bildirib ki, Mühafizə Alayının 7, 11 və 12 saylı bölüklərinin rəhbərləri cəzaçəkmə müəssisələrində nəzarət-buraxılış işinin təşkilində kobud pozuntulara yol verdikləri üçün cəzalandırılıblar.
Müfəttişliyin rəisi bildirib ki, müəssisələrə qadağan olunmuş əşyaların keçirilməsi göstərir ki, bölük əməkdaşları tərəfindən nəzarət-buraxılış məntəqələrində yoxlamalar səthi aparılır.
Ələkbərov bildirib ki, Penitensiar Xidmətdə şənbə günü ötən ilin yekunlarına və 2009-cu ildə qarşıda duran vəzifələrə həsr olunmuş əməliyyat müşavirəsinin yekununda Mühafizə Alayının 7, 11 və 12 saylı bölüklərinin rəhbərləri işdən azad olunub, 8 saylı bölüyün rəhbəri isə intizam qaydasında cəzalandırılıb.
Müşavirədə Alayın döyüş xidməti və döyüş hazırlığının təşkilində nöqsanların qeydə alındığı bildirilib.
Belə ki, bir qrup əsgərə imtiyazlı şərait yaradılıb və onlar qaravul xidmətinə cəlb olunmayıb, nəticədə qarovul xidmətində olan əsgərlər istirahət etmədən fasiləsiz qarovula cəlb olunublar.
Məqalə müəllifi ilə əlaqə ünvanı:[email protected]