Azərbaycan, Bakı, 24 fevral / Trend , müxbir E.Tariverdiyeva / Yeni "Gürcüstan naminə Alyans" partiyasından prezident postuna namizəd İrakli Alasaniya ekspertlərin rəyinə görə, növbədənkənar prezident seçkilərinin keçirilə biləcəyi mart ayında Gürcüstan prezidenti olmaq üçün bütün şanslara malikdir.
"Alasaniya - yeni müxalifət alyansının lideri qismində maraqlı seçimdir, onun diplomatik təcrübəsi və separatçı abxaz hökuməti ilə əlaqələri onu prezidentliyə yeganə namizəd edir", - deyə Qafqaz üzrə britaniyalı ekspert Ziba Norman bildirib.
Dünən yaradılan "Gürcüstan naminə alyans" müxalifət partiyaları alyansının Gürcüstan prezidenti postuna yeganə namizədi İrakli Alasaniya olacaq. Bu barədə yeni alyansın yaradılmasının yekununda keçirilən mətbuat konfransında siyasi alyansın lideri Alasaniya, "Yeni qaydalar" partiyasının rəhbəri David Qamkrelidze və respublikaçıların lideri David Usupaşvili bildiriblər.
Ötən il Gürcüstanda ali dövlət postuna namizədliyini irəli sürən "Yeni qaydalar"ın lideri Qamkrelidzenin sözlərinə görə, alyansı gələcək prezident seçkilərində namizəd qismində İrakli Alasaniya təmsil edəcək. "Biz qələbəsinə inandığımız layiqli namizəd seçmişik", - deyə Trend -a Qamkrelidze bildirib.
Alasaniya əvvəllər dövlət təhlükəsizlik, müdafiə, xarici işlər nazirliklərində işləyib. Gürcüstanın ABŞ, Kanada və Meksikadakı səfirliklərinin ikinci katibi olub, sürgündə olduğu zaman Abxaziya hökumətinə rəhbərlik edib, gürcü-abxaz danışıqlarında Gürcüstan dövləti rəhbərinin şəxsi nümayəndəsi olub. 2006-cı ilin iyulunda Gürcüstanın BMT-dəki daimi nümayəndəsi postuna təyin edilib.
Alasaniya Gürcüstanın BMT-dəki səfiri vəzifəsindən nə üçün istefa verdiyini açıqlamayıb. RİA "Novosti"nin verdiyi xəbərə görə, bir neçə aydır ki, Gürcüstan KİV-də onun hələ BMT-də səfir olan zaman ölkə rəhbərliyinin 2008-ci il avqust hadisələri ilə bağlı çıxardığı qərarlardan narazı olması barədə şayiələr gəzir.
Avqustun 8-nə keçən gecə tanınmamış Cənubi Osetiya respublikasında irimiqyaslı hərbi əməliyyatlar başlayıb. Gürcü qoşunları Tsxinvaliyə daxil olub. Sonradan rus qoşunları Tsxinvalini tutub və gürcü hərbiçilərini Gürcüstan ərazisinə sıxışdırıblar. Avqustun sonunda Rusiya Cənubi Osetiya və Abxaziyanın müstəqilliklərini tanıyıb. Tbilisi buna cavab olaraq, Moskva ilə diplomatik əlaqələri kəsib və iki qondarma respublikanı "işğal olunmuş ərazilər" adlandırıb.
Ekspertlər hesab edirlər ki, yeni "Gürcüstan naminə alyans" partiyasının prezident postuna namizədi vaxtından əvvəl Gürcüstan prezidenti olmaq üçün bütün şanslara malikdir.
"Alasaniya prezident postuna güclü namizəd kimi görünür və müharibədən sonra Gürcüstan xalqını birləşdirmək üçün kifayət qədər təcrübəyə malikdir", - Trend -a elektron poçt ilə Transatlantik İnstitutunun direktoru (London) Ziba Norman bildirib.
Müstəqil gürcü politoloqu Ramaz Tsiskarişvili də Alasaniyanın Gürcüstanın ali dövlət postunu tutması üçün olan şanslarını tamamilə real hesab edir.
"Əgər namizəd bu və ya digər partiya liderlərinin günah və səhvləri ilə yüklənməyibsə, onun şansı daha çoxdur, bu nöqteyi nəzərdən Alasaniya istisna edilməyəcək", - deyə Trend -a Tsiskarişvili bildirib.
Müşahidəçilər Saakaşvilinin onu vəzifəsindən azad etməmişdən əvvəl özünün istefa verməsini Alasaniyanın "kozırı" kimi hesab edirlər. O, bu halda müxalifətdə lider rollardan birini tutmaq imkanı əldə edib.
"Əgər bir insan nümayişkaranə surətdə istefa verirsə, bu onun müxalif reytinqini qaldırır, yox əgər onu istefaya göndərirlərsə və o, müxalifətə keçirsə, bu hakimiyyətin hərəkətindən küskünlük və narazılıq kimi görünür", - Trend -a MDB Ölkələri İnstitutunun Qafqaz sektorunun müdiri Mixail Aleksandrov bildirib.
Müşahidəçilərin əksəriyyətin əmindirlər ki, artıq yazda Gürcüstanda növbədənkənar prezident seçkiləri elan olunacaq.
Gürcüstanlı politoloq Ramaz Sakvarelidze Trend -a bildirib ki, Saakaşvili gözlənilmədən referendumun keçirilməsinə gedə bilər. "İstisna olunmur ki, Gürcüstan prezidenti "Gürcüstan naminə alyans"ın siyasi tələblərini nəzərə alacaq və həqiqətən referendum təyin edəcək", - deyə Sakvarelidze vurğulayıb.
Politoloqun rəyinə görə, bu, vaxtın uzadılması siyasəti olacaq, çünki referendum kifayət qədər uzun vaxt tələb edir. Sakvarelidze bildirib ki, bu cür presedent artıq 2008-ci il yanvarın 5-də növbədənkənar prezident seçkiləri qismində olub.
"Düzdür, prezident bu gün də gözlənilməz referendumun keçirilməsinə razılıq verə bilər, belə ki, referendumun nəticələri üzərində nəzarət yenə də hakimiyyətin əlində olacaq", - deyə politoloq qeyd edib.
Aleksandrovun sözlərinə görə, növbədənkənar seçkilər artıq martda keçirilə bilər.
Norman hesab edir ki, Gürcüstan ötən yay ölkəyə dəyən "yaraları sağaltmağa" çalışır və siyasi dəyişikliklər də bu prosesin qaçılmaz hissəsidir.
"Nəinki müxalifət, həm də ictimaiyyətin böyük bir hissəsi ölkə rəhbərliyinin mövcud problemlərin həlli üçün potensialının olmadığına əmin olmağa başlayır, - deyə Tsiskarişvili bildirib, - növbədənkənar prezident seçkilərinin keçirilməsi ictimaiyyətin arzu olunanlara nail olmaq üçün konstitusiyanın idarə olunması prosesində nə dərəcədə tələbkar olacaqlarından asılıdır".
Materialın hazırlanmasında R.Ağayev (Moskva), N.Kirtsxaliya (Tbilisi) iştirak edib.
Məqalə müəllifi ilə əlaqə ünvanı: [email protected]
