Azərbaycan, Bakı, 19 mart / Trend ,müxbir K.Zərbalıyeva /
Miqrasiya proseslərinin idarə olunmasında "bir pəncərə" prinsipinin tətbiqi ölkədə miqrasiya proseslərinin daha çevik və işlək mexanizmlər əsasında idarə edilməsi, bu sahədə operativliyin təmini və həllini gözləyən problemlərin aradan qaldırılması baxımından vacib əhəmiyyət daşıyır, - Trend -un məlumatına görə, bunu Dövlət Miqrasiya Xidmətinin (DMX) yaradılmasının 2-ci ildönümü münasibəti ilə cümə axşamı keçirilən tədbirdə qurumun rəisi Arzu Rəhimov deyib.
Ölkə başçısı bu il martın 4-də Miqrasiya proseslərinin idarəolunmasında "bir pəncərə" prinsipinin tətbiqi haqqında fərman imzalayıb.
Fərman respublikada miqrasiya idarəetmə mexanizminin təkmilləşdirilməsi, Azərbaycana gələn əcnəbilərə və vətəndaşlığı olmayan şəxslərə ölkə ərazisində qanuni əsaslarla yaşamaları və əmək fəaliyyəti ilə məşğul olmaları üçün müvafiq icazələrin verilməsi, onların yaşayış yeri üzrə qeydiyyata alınması prosedurunun sadələşdirilməsi, bu sahədə şəffaflığın təmin edilməsi məqsədinə xidmət edir.
Rəhimov bildirib ki, Azərbaycan dünya əhəmiyyətli nəqliyyat yollarının kəsişdiyi coğrafi məkanda yerləşdiyi üçün ölkəmizin ərazisindən çoxsaylı tranzit miqrantların gediş-gəlişi qaçılmazdır.
"Əsas məsələ həmin miqrantların qanunsuz olaraq ölkə ərazisində məskunlaşmalarının və qanunsuz miqrantların ölkə ərazisindən tranzit keçidi kimi istifadə edərək üçüncü ölkəyə keçmələrinin qarşısının alınmasıdır", - Rəhimov vurğulayıb.
Xidmət rəisi, həmçinin bildirib ki, 2008-ci ilin avqust ayından Miqrasiya Xidmətinə əcnəbilər və vətəndaşlığı olmayan şəxslərin ölkədə olma müddətinin uzadılması, müvəqqəti yaşama icazəsinin verilməsi, immiqrant statusunun alınması, vətəndaşlığa qəbul, bərpa, xitam, eləcə də vətəndaşlıq mənsubiyyətinin və qaçqın statusunun müəyyənləşdirilməsi ilə bağlı 18 min 574 müraciət daxil olub.
Rəhimov qeyd edib ki, mövcud qanunvericiliyə bir çox əlavə və dəyişikliklər edilib, o cümlədən əcnəbilərin və vətəndaşlığı olmayan şəxslərin ölkə ərazisində olma müddətləri müəyyən edilib, onlara Azərbaycanda müvəqqəti və daimi yaşamaq üçün nəzərdə tutulmuş sənədlər təsdiq edilib, əcnəbilərin qeydiyyat sistemi təkmilləşdirilib, miqrasiya qanunvericiliyinin pozulmasına görə məsuliyyət artırılıb.
Məqalə müəllifi ilə əlaqə ünvanı: [email protected]