Türkmənistan, Aşqabad, 02 aprel / Trend , müxbir H.Həsənov /
Ötən ilin dekabr ayında Türkmənistanda səfərdə olmuş Bolqarıstan Prezidenti Georgi Pırvanov türkmənistanlı həmkarı Qurbanqulu Berdimuhammedova salamlarını yollayaraq qeyd edib ki, Bolqarıstanda böyük həvəslə cavab səfəri gözləyirlər və bu dövlətlərarası münasibətlərdə əlamətdar hadisə olacaq.
Altın Asır milli telekanalının verdiyi məlumata əsasən, bu barədə Aşqabadda işgüzar səfərdə olan Bolqarıstan xarici işlər naziri İvaylo Kalfin deyib.
Berdimuhammedov deyib ki, yüksək səviyyədə keçən danışıqlar və əldə olunmuş razılaşmalar ənənəvi türkmən-bolqar münasibətlərinin və əməkdaşlığının gələcəkdə də inkişaf etməsinə zəmin yaradır.
Əlaqələrin əsas istiqaməti kimi ticarət-iqtisadi, yanacaq-enerji, nəqliyyat, sənaye və tikinti sektorları qeyd olunub. Türkmənistanın turizm sahəsinə aid böyük planları və Bolqarıstanın bu sahədəki səriştəsi olduğundan sözügedən sahədə də əməkdaşlığın səmərəli olacağı qeyd edilib. Bu səbəbdən qonaq Xəzər sahilində gerçəkləşdirilən "Avaz" beynəlxalq dəniz turizminə böyük maraq göstərib.
Məqalə müəllifi ilə əlaqə ünvanı: [email protected]
