Azərbaycan, Bakı, 21 avqust / Trend , müxbir C.Babayeva /
Azərbaycanın müxalif Qarabağ və Respublika Uğrunda Vətəndaş Hərəkatında təmsil olunan partiyaların Seçki Məcəlləsinə əlavə və dəyişikliklərlə bağlı təklifləri vahid sənəd şəklində hazırlanacaq.
"Hər bir partiyanın Seçki Məcəlləsinə etmək istədiyi əlavə və dəyişikliklərlə bağlı təkliflərini birləşdirib bir sənəd şəklində hazırlamaq barədə razılığa gəlinib", - cümə günü Trend -a Qarabağ və Respublika Uğrunda Vətəndaş Hərəkatının işçi qrupunda Müsavat Partiyasının təmsilçisi Gülağa Aslanlı bildirib.
Trend -un arayışı: Qarabağ və Respublika Uğrunda Vətəndaş Hərəkatı bu ilin martın 18-də keçirilmiş referndum zamanı yaradılıb. Hərəkatda Azərbaycan Xalq Cəbhəsi, Vətəndaş və İnkişaf, Liberal, Demokrat, Ümid partiyaları və bir neçə ictimai təşkilat təmsil olunur.
Hakim Yeni Azərbaycan Partiyası hesab edir ki, Seçki Məcəllləsinə ciddi dəyişikliklərin edilməsinə ehtiyac yoxdur.
Azərbaycanda bələdiyyə seçkisinin bu ilin dekabrında keçirilməsi nəzərdə tutulur.
Aslanlı bildirib ki, sənədin hazırlanması ona həvalə olunub. "Təkliflər Müsavat Partiyasının 2008-ci ildə müxalifət qüvvələrinin əlavə və təklifləri əsasında hazırlanıb Milli Məclisə təqdim etdiyi sənədlə müqayisə ediləcək və əlavələr olunacaq. İşçi qrupunun növbəti toplantısında ümumi müxalifətin bütün təkliflərinin nəzərə alındığı sənədi ortaya çıxaracağıq", - o deyib.
Onun sözlərinə görə, Milli Məclisin payız sessiyasına qədər sənədin hazırlanması başa çatdırılacaq. "Seçki Məcəlləsindən sonra "Bələdiyyələrin statusu haqqında" qanuna əlavə və dəyişiklilərlərlə bağlı təkliflərin hazırlanmasına başlanılacaq", - Aslanlı bildirib.
Məqalə müəllifi ilə əlaqə ünvanı: [email protected]