Azərbaycan, Bakı, 28 sentyabr / Trend , müxbir A.Hüseynbala /
Azərbaycanın liberalyönümlü partiyalarının bələdiyyə seçkiləri ilə bağlı blok yaratmaq təşəbbüsü baş tutmayıb.
"Məsləhətləşmələr apardığımız partiyalar blokun yaradılmasına etiraz etməsələr də, hər bir partiyanın öz maraqlarından çıxış etməsi uğurla nəticələnmədi", - bazar ertəsi Trend -a "Azad Azərbaycan" blokunun yaradılması təşəbbüsü ilə çıxış edən Azərbaycan Liberal Demokrat Partiyasının (ALDP) sədri Fuad Əliyev bildirib.
Trend -un arayışı: Azərbaycanda bələdiyyə seçkisinin 2009-cu il dekabrında keçirilməsi nəzərdə tutulur. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Azərbaycanda bələdiyyələrin birləşdirilməsi prosesi nəticəsində onların sayı 2760-dan 1720-ə qədər enib.
Əliyevin sözlərinə görə, bir çox məsələlərlə bağlı partiyalar arasında konsensus əldə olunmayıb. "Bu daha çox namizədlərin müəyyənləşdirilməsində və onların dəstəklənməsində özünü büruzə verdi", - partiya sədri əlavə edib.
Onun fikrincə, blok yaradılsaydı təşəbbüsü dəstəkləyən partiyaların təkcə bələdiyyə yox, bütün seçkilərdə iştirakı mümkün ola bilərdi. "Biz istəyirdik ki, yaradacağımız blok bütün seçki proseslərində iştirak edib həmrəlik nümayiş etdirsin. Amma bəzi partiyalarla apardığımız danışıqlardan belə nəticə çıxardıq ki, əgər birlikdə olsaq yaradacağımız blokun ömrü az olar, bəlkə də seçki öncəsi dağıla bilərdi", - ALDP sədri vurğulayıb.
Əliyev deyib ki, bu səbəbdən liberalyönümlü partiyaların bələdiyyə seçkilərində ayrı-ayrılıqda iştirakı qərara alınıb.
АLDP 1999-cı ildə yaradılıb. 2000-ci ildə partiyanın sədri Zakir Məmmədov vəfat etdikdən sonra 2001-ci ildə ALDP ikiyə bölünüb. Valeh İbadov və Fuad Əliyev hər ikisi ALDP adına iddia ediblər. 2004-cü ildə Ali Məhkəmənin qərarı ilə Fuad Əliyevin rəhbərlik etdiyi partiya ALDP kimi tanınıb və dövlət qeydiyyatından keçib.
Məqalə müəllifi ilə əlaqə ünvanı: [email protected]
