Azərbaycan, Bakı, 02 noyabr / Trend , müxbir A.Hüseynbala/
Azərbaycanın müxalifət partiyası Seçki Məcəlləsindəki bəzi qaydaların bələdiyyə seçkilərinə uyğunlaşdırılmadığını iddia edir.
"Bələdiyyə seçkilərində namizədlərin siyasi partiyalar və siyasi partiyaların blokları tərəfindən irəli sürülməsi qaydaları Seçki Məcəlləsinin 54-cü maddəsində kifayət qədər mürəkkəb yazılıb. Məcəllənin bələdiyyə seçkilərinə həsr olunmuş yeddinci bölməsində bu qaydalar bələdiyyə seçkilərinə uyğunlaşdırılmayıb", - Trend -un məlumatına görə, bazar ertəsi Müsavat Partiyasının qəbul etdiyi bəyanatda bildirilib.
Trend -un arayışı: Seçki Məcəlləsinin 54-cü maddəsində namizədlərin siyasi partiyalar və siyasi partiyaların blokları tərəfindən irəli sürülməsi prinsipləri göstərilib.
Azərbaycanda bələdiyyə seçkisi dekabrın 23-də keçiriləcək. 1718 bələdiyyəyə 15682 bələdiyyə üzvünün seçilməsi nəzərdə tutulur.
Azərbaycanda bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Partiya hesab edir ki, Mərkəzi Seçki Komissiyasının (MSK) qəbul etdiyi təlimatlarda bu qaydalar bürokratik əngəllərlə zənginləşdirilib və analoqu olmayan hala salınıb. "Məsələn, Məcəllənin 52.3 və 54-cü maddələrində və "Bələdiyyə seçkilərində namizədlərin siyasi partiyalar və siyasi partiyaların blokları tərəfindən irəli sürülməsi qaydaları haqqında təlimat"da eyni sənədlər siyasi partiyalardan iki dəfə tələb olunur. Bu sənədlər siyasi partiyanın qeydə alınması barədə şəhadətnamənin notariat qaydasında təsdiq edilmiş surəti, siyasi partyanın qüvvədə olan Nizamnaməsinin notariat qaydasında təsdiq edilmiş surəti, siyasi partiyaların təyin etdikləri səlahiyyətli nümayəndələrin siyahıları və siyasi partiyanın səlahiyyətli nümayəndələrinin Azərbaycan Respublikasının Mülkü Məcəlləsində nəzərdə tutulmuş qaydada rəsmiləşdirilmiş vəkalətnamələridir", - sənəddə vurğulanır.
Bəyanatda qeyd edilir ki, bu sənədlər MSK-ya və dairə seçki komissiyalarına, 1-ci və 2-ci sənəd isə həm də "Bələdiyyə seçkilərində xüsusi seçki hesablarının açılması qaydaları haqqında təlimat"a uyğun olaraq xüsusi seçki hesabı açılarkən bankların tələbi ilə onlara da təqdim olunmalıdır. "Respublika üzrə 119 seçki dairəsində bələdiyyə seçkilərinin keçirildiyi nəzərə alınarsa, bu sənədlərin hər birindən 240 nüsxə hazırlanması gərəkdir. "Qeyd olunan sənədlərin MSK-ya təqdim edildiyi, təsdiq olunmuş səlahiyyətli nümayəndələrin siyahılarının rəsmi dövlət qəzetlərində çap olunduğu halda, bu sənədlərin dairə seçki komissiyalarına təqdimolunma məcburiyyəti nədən irəli gəlir" sualına MSK-da cavab verən yoxdur", - sənəddə əlavə olunur.
Partiya hesab edir ki, MSK tərəfindən Müsavata yönəlik növbəti maneəçilik, partiyanın bələdiyyə seçkilərində iştirakına aid sənədlərin MSK-ya oktyabr ayının 29-da təhvil verilməsinə baxmayaraq, partiyanın səlahiyyətli nümayəndələrinin bu günə qədər təsdiq olunmamasıdır. "Bu hal partiyanın namizədlərinin dairə seçki komissiyalarına çatdırılmasını gecikdirmək üçündür. Belə ki, namizədliyin təsdiq olunması üçün sənədlər dairə seçki komissiyalarına siyasi partiyaların səlahiyyətli nümayəndələri tərəfindən təqdim olunmalıdır. O da qeyd olunmalıdır ki, Seçki Məcəlləsində MSK-ya təqdim olunan səlahiyyətli nümayəndələrin siyahısının təsdiqi üçün 5 gün lazım gəlməsi haqqında maddə yoxdur", - bəyanatda deyilir.
"Beləliklə, MSK qəbul etdiyi təlimatlarla və partiyanın səlahiyyətli nümayəndələrinin təsdiqini gecikdirməklə, Müsavat Partiyasının bələdiyyə seçkilərində iştirakını əngəlləməkdə davam edir", - bəyanatda bildirilir.
Qeyd olunanları nəzərə alaraq, Müsavat MSK-nın siyasi partiyaların bələdiyyə seçkilərində iştirakına əngəllər yaratdığını və bu əngəllərin tezliklə aradan qaldırılmasını tələb edir.
Müsavat Partiyası 1911-ci ilin oktyabrında Bakıda yaradılıb. Müsavat Partiyasının (Bərpa) Qurultayı 1992-ci il noyabrın 7-də Bakıda Respublika sarayında keçirilib. Gizli səsvermənin yekunları əsasında İsa Qəmbər əksəriyyət səslə Müsavat Partiyasının başqanı seçilib.
Qəmbər Аzərbаycan Pаrlаmеntinin еks-spikеri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Pаrtiyа 4 nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]