Azərbaycan, Bakı, 17 may /Trend, müxbir A.Hüseynbala/
Azərbaycanın müxalifət blokunda təmsil olunan partiya rəhbəri deyib ki, deputatlığa namizədlərin müəyyənləşdirilməsi prosesi başa çatıb.
"Hazırlanan siyahılar partiya rəhbərlərinin birgə müzakirəsinə veriləcək və biz birlikdə blokun ümumi namizədlərini müəyyənləşdirəcəyik", - bazar ertəsi Trend-ə "Azadlıq" blokunda təmsil olunan Vətəndaş və İnkişaf Partiyasının (VİP) sədri Əli Əliyev bildirib.
Trend-in arayışı: Azərbaycanda parlament seçkilərinin 2010-cu ilin payızında keçiriləcəyi gözlənilir. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində keçirilir.
Əliyevin sözlərinə görə, onun rəhbərlik etdiyi partiya deputatlığa 40 nəfərin siyahısını hazırlayıb.
"Partiya sədrlərinin müzakirəsi zamanı namizədlərin hansının daha şanslı olub-olmaması dəqiqləşdiriləcək. Biz namizəd irəli sürəcəyimiz dairələri də birgə müzakirələrdən sonra müəyyənləşdirəcəyik", - VİP sədri əlavə edib.
Bu prosesin nə vaxt başlayacağına gəldikdə, Əliyev deyib ki, hazırda mayın 16-da keçirmək istədikləri kütləvi aksiyanın nəticələri müzakirə olunur. "Aksiya zamanı saxlanılanlar var. Düşünürəm ki, blokun vahid siyahısının hazırlanması bu ayın sonuna qədər başa çatacaq", - o xatırladıb.
VİP sədri növbəti aksiyanın vaxtının da hələ ki, dəqiqləşdirilmədiyini bildirib.
"Bir-iki günə aksiyalar üzrə işçi qrupun toplantısı keçiriləcək və növbəti mitinqin vaxtı müəyyənləşdiriləcək", - Əliyev vurğulayıb.
"Azadlıq" blokunu 2005-ci il parlament seçkiləri ərəfəsi Azərbaycan Xalq Cəbhəsi, Demokrat, Müsavat və Liberal partiyaları təsis ediblər. Seçkilərdən sonra Demokrat və Müsavat partiyaları blokdan çıxıblar, Vətəndaş və İnkişaf Partiyası isə "Azadlıq" blokuna üzv olub.
Bloka daxil olan Azərbaycan Xalq Cəbhəsi Partiyası parlament seçkiləri ərəfəsi kütləvi aksiyaların keçirilməsi haqqında qərar verib.
