Azərbaycan, Bakı, 20 sentyabr /Trend, müxbir T.Hacıyev/
Azərbaycanın müxalif partiyasının Divan iclasında kütləvi aksiyalar keçirilməsi məsələsi müzakirə olunub. Bu barədə bazar ertəsi Trend-ə Müsavat Partiyasının sədr müavini Tofiq Yaqublu məlumat verib.
"Artıq partiya strukturlarına ciddi tapşırıqlar verilib ki, kütləvi tədbirlərə hazırlaşsınlar. Biz aksiyaların keçirilməsi üçün daha münasib yerlərin ayrılması uğrunda mübarizəmizi davam etdirəcəyik və aksiyaların daha da kütləvi keçirilməsinə çalışacağıq. Seçkilərə hazırlığın elə mərhələsidir ki, bu mərhələ həftənin sonuna qədər başa çatacaq və ondan sonra kütləvi aksiyaların keçirilməsi məsələsi müzakirə olunacaq. Aksiyaların dəqiq vaxtının partiya Divanının gələn həftə keçiriləcək iclasında dəqiqləşəcəyi gözlənilir", - Yaqublu əlavə edib.
Azərbaycanın müxalifət partiyaları Bakı şəhər İcra Hakimiyyətinin (BŞİH) ayırdığı yerlərdə mitinq keçirməkdən imtina edirlər. BŞİH müxalifət partiyalarına aksiyaları Binəqədi qəsəbəsinin İdman-Sağlamlıq Kompleksinin stadionunda, 20-ci yaşayış sahəsi, Elçin Əzizov küçəsində yerləşən sürücülük məktəbinin həyətindəki meydança və ya Zığ yolu küçəsi, 29/22-ci məhəllə ilə üzbəüz meydançada keçirməyi tövsiyə edir.
Azərbaycanda parlament seçkiləri noyabrın 7-də keçiriləcək. Sentyabrın 3-də seçkilərə rəsmi start verilib. Bundan əvvəlki seçkilər 2005-ci ilin noyabr ayında keçirilib. Azərbaycanda parlament seçkiləri majoritar sistem üzrə 125 seçki dairəsində aparılır.