Azərbaycan, Bakı, 25 dekabr /Trend, müxbir N.Quliyev /
Misirdə İsrail casuslarının həbsi və İsrail səfirinin ölkədən getməsi iki ölkənin qarşılıqlı əlaqələrinə heç bir təsir göstərmir. Bu barədə Trend-ə Yaxın Şərq üzrə misirli analitik Xəlil əl-Ənani bildirib.
"Əlaqələrin kəsiləcəyi gözlənilmir, bunlar Misirlə İsrail arasında baş verən adi proseslərdir və ölkələr arasında münasibətlər əvvəlki kimi sabit olacaq", - əl-Ənani deyib.
Dekabrın 20-də Misirdə İsrailə casusluqda şübhəli bilinən dörd misirli həbs olunub. Onlar casus şəbəkəsi yaradılmasında günahlandırılırlar. Casusların tapşırıqlarına yerli məmurların telefon söhbətlərinin yazılması, Sina yarımadasına səfər edən yapon və çinli turistlər haqqında informasiyanın toplanması daxildir. Həbs olunanlar Misirin turizm sənayesinə zərbə vurmaq məqsədilə turistlərin oğurlanmasına cəhddə günahlandırırlar. Dekabrın 24-də İsrailin səfiri İshaq Levan öz xanımı ilə birgə gözlənilmədən Misiri tərk edib. O, gedişinin səbəblərini və qayıdacağı vaxtı açıqlamayıb.
"Misirin xüsusi xidmət orqanları İsrailin casuslarını öz missiyalarını yerinə yetirməzdən əvvəl həbs edə biliblər", - Xəlil əl-Ənani bildirib.
