Azərbaycan, Bakı, 3 may /Trend, müxbir T.Cəfərov/
Son günlərdə İranda hakimiyyətdə olan mühafizəkarlar düşərgəsində qarşıdurmalar Prezident Mahmud Əhmədinejad tərəfdarlarının qarşıdan gələn parlament seçkilərinə məqsədli hazırlıq proqramlarının baş tutacağını şübhə altına salır.
Almaniyada fəaliyyət göstərən iranlı politoloq və dinşünas Həsən Şəriətmədari Trend-ə bildirib ki, hakim partiyada qarşıdurmalar davam edərsə, Əhmədinejad getdikcə öz nüfuzunu itirəcək.
İranın "Vilayi Xətiblər" (Moizəçilər) Assosiasiyasının rəhbəri Abbas Əmirifər İmam Mehdi ilə bağlı filmin çəkilişinə kömək göstərdiyi üçün həbs olunub. Ötən ilin mayında İran Prezidenti Administrasiyasının sabiq rəhbəri İsfəndiyar Rəhim Məşai Əmirifəri Prezident Administrasiyasının Mədəniyyət Şurasının üzvü seçmişdi. Lakin Məşai özü də keçən ay vəzifəsindən uzaqlaşdırıldı.
Bir çox deputatlar, dini şəxsiyyətlər və İran İslam İnqilabı Keşikçiləri Korpusu qəti olaraq Əhmədinejadın çevrəsində olan bəzi nüfuzlu şəxsiyyətlərə qarşıdırlar. Keçən ay Əhmədinejad milli təhlükəsizlik naziri Heydər Müslehinin istefasını qəbul etsə də, ali lider ayətullah Əli Xamneyi Müslehinin işdən çıxarılmasına mane oldu. Bu hadisədən sonra Əhmədinejad 10 gün işə çıxmaqdan imtina etdi və Nazirlər Kabinetinin iki iclası Əhmədinejadın iştirakı olmadan keçirildi.
Xamneyi keçən həftə üç dəfə hakimiyyətdə olan qüvvələri bir-birinə qarşı dözümlülük nümayiş etdirməyə çağırıb. Parlament nümayəndələri Əhmədinejada impiçment ilə xəbərdarlıq ediblər və nəhayət Əhmədinejad mayın 1-də işinə qayıdıb.
Şəriətmədarinin fikrincə, Əhmədinejad tərəfdarlarının seçkilərdə qələbə qazanmaq üçün digər mühafizəkarlara qarşı müntəzəm təşkilatlanması ayətullah Xamneyini narahat edirdi.
"Qarşıdan gələn parlament seçkilərində iştirak edəcək cinahlarla bağlı indidən fikir bildirmək tezdir, lakin ayətullah Əli Xamneyinin təhlükəsizlik naziri Müslehini vəzifəsinə qaytarması onu göstərir ki, Əhmədinejad tərəfdarlarının seçkilərdə qələbə qazanmaq üçün digər mühafizəkarlara qarşı müntəzəm təşkilatlanması Xamneyini də narahat edirdi", - Şəriətmədari Berlindən telefonla Trend-ə bildirib.
İranda doqquzuncu çağırış parlament seçkiləri 2012-ci ilin mart ayının 2-də keçiriləcək. Seçkilərə bir ilə yaxın vaxt qalsa da, İranda artıq müxtəlif siyasi qüvvələr öz seçki hazırlıqlarına başlayıblar və bir çox qüvvələr regionlarda əyani şəkildə olmasa da, seçki kampaniyalarına başlayıblar.
Şəriətmədarinin fikrincə, ayətullah Xamneyinin hazırkı güc nümayişi seçkilərə kimi davam edərsə, Əhmədinejad tərəfdarlarının gələcək parlament seçkilərində iştirakı ya olmayacaq, ya da çox solğun şəkildə olacaq. "Ayətullah Xamneyi Əhmədinejada qarşı mövqeyində dəyişiklik etməzsə, Əhmədinejad tərəfdarlarının gələcək seçkilərdə şansı azdır. Çünki İranın Nəzarət Şurası namizədlərin səlahiyyətlərini təsdiq edir və bu qurum İranın ali rəhbərinin nəzarəti altında fəaliyyət göstərir", - o deyib.
İranın Nəzarət Şurası İran İslam Respublikasının nəzarətedici qurumlarından biridir. Həmin Şuranın 12 üzvü var. Nəzarət Şurasının 6 üzvu birbaşa ali rəhbər Xamneyi tərəfindən təyin olunur, digər altı üzv isə hüquqşünaslardır. Onlar İran Ədliyyə Nazirliyi tərəfindən parlamentə təqdim olunur və səlahiyyətləri parlament tərəfindən təsdiqlənir. Həmin altı nəfərin səlahiyyətinin təsdiq olunmasında da bilavasitə Xamneyinin rolu var. Nəzarət Şurası İran Parlamentinin bütün qanunlarını, eləcə də bələdiyyə seçkilərindən başqa ölkədə keçirilən bütün seçkilərdə iştirak edəcək namizədlərin səlahiyyətlərini təsdiqləyir. Ekspertlərin fikrincə, hər halda Nəzarət Şurası ayətullah Xamneyinin istəyinə uyğun addım atacaq.
İran Jurnalistlər Birliyinin sabiq sədri, sabiq deputat və daxili məsələlər üzrə ekspert Əli Məzrui isə Trend-ə telefonla Norveçdən bildirib ki, son hadisələrdən sonra Əhmədinejad hakim mühafizəkarlar düşərgəsində öz nüfuzunu itirib.
"Mühafizəkarlar düşərgəsi hazırda iki dəstəyə bölünüb: ayətullah Xamneyinin tərəfdarları və Əhmədinejad tərəfdarları. Əhmədinejad son hadisələrdən sonra mühafizəkarlar arasında öz nüfuzunu itirib. Bu, seçkilərdə onun tərəfdarlarının şansının az olmasına səbəb olacaq", - Məzrui hesab edir.
