Azərbaycan, Bakı, 7 may /Trend/
Azərbaycan Xarici İşlər Nazirliyinin təşkilatçılığı ilə mayın 9 - da Şahmat klubunda diplomatik xidmət orqanlarının əməkdaşları üçün birinci "Brain Ring" intellektual oyunu keçiriləcək.
Trend-in XİN-in mətbuat xidmətinə istinadən verdiyi məlumata görə, oyunun keçirilməsində məqsəd diplomatların asudə vaxtlarının səmərəli təşkili və intellektual biliklərinin inkişaf etdirilməsidir.
Sözügedən oyun komanda formatında (4 nəfərdən ibarət) olimpiya sistemi ilə 3 mərhələdə (1/4, 1/2 və final) keçiriləcək.
Başlıca olaraq məntiqi xarakter daşıyacaq suallar tarix, ədəbiyyat, incəsənət, idman - bütünlükdə ümumi dünyagörüşü ilə əlaqəlidir.
Yarışda 8 komanda iştirak edəcək. Qaliblər kubok və XİN-in rəhbərliyi tərəfindən imzalanmış diplomlarla mükafatlandırılacaq.