Azərbaycan, Bakı, 8 oktyabr/Trend, müxbir S. Ağayeva/
Azərbaycanda prezident seçkilərində MDB Parlamentlərarası Assambleyasından (PA) olan beynəlxalq müşahidəçilər oktyabrın 8-də Mərkəzi Seçki Komissiyasının (MSK) sədri Məzahir Pənahovla görüşüblər.
Trend-in məlumatına görə, bu barədə missiya qərargahının xəbərində deyilir.
MSK sədri görüş zamanı müşahidəçilərə seçkilərə hazırlığın final mərhələsi haqqında məlumat verib.
Məlumata görə, M. Pənahov, həmçinin MDB PA-dan olan beynəlxalq müşahidəçilərin keçirdiyi monitorinqin obyektivliyini və yüksək keyfiyyətini qeyd edib.
Rusiya Dövlət Dumasının MDB və Həmvətənlərin İşləri üzrə Komitə sədrinın I müavini Oleq Lebedev MSK sədrinə MDB PA-nın hazırladığı uzunmüddətli monitorinq haqqında hesabat verib, həmçinin bildirib ki, müşahidələrin yekunu üzrə mövcud seçki qanunvericiliyinin pozulması faktları aşkar edilməyib.