...

Goranboy şəhərinin 2039-cu ilədək inkişafına dair Baş planı təsdiqlənib (ƏLAVƏ OLUNUB)

Siyasət Materials 1 Dekabr 2022 17:58 (UTC +04:00)
Goranboy şəhərinin 2039-cu ilədək inkişafına dair Baş planı təsdiqlənib (ƏLAVƏ OLUNUB)

Trend-i buradan izləyin

Bakı. Trend:

Goranboy şəhərinin yeni Baş planı təsdiq olunub. Şəhərin Baş plan layihəsi 2039-cu ilədək olan dövr üçün nəzərdə tutulub. Yeni sənəd Dövlət Şəhərsalma və Arxitektura Komitəsinin sifarişi ilə “Integris" Məhdud Məsuliyyətli Cəmiyyəti tərəfindən hazırlanıb.

Komitədən Trend-ə bildirilib ki, şəhərin Baş planı layihələndirilərkən şəhər sakinlərinin iş yerləri, rekreasiya əraziləri və yaşayış sahələrinə tələbatının təmin edilməsi prioritet götürülüb.

Planlaşdırma sənədinin hazırlanma mərhələsində şəhər üzrə demoqrafik göstəricilər təhlil edilib, əhali sayının mövcud 10,5 mindən hesabat dövrü ərzində 12,6 min nəfərədək artacağı proqnozlaşdırılıb. Əhalinin artımına uyğun olaraq yaşayış fondunun 305,4 min kvadratmetrdən 478,8 min kvadratmetrədək artırılması təklif edilir.

Həmçinin şəhərin inkişafına uyğun olaraq küçə və yolların uzunluğunun mövcud 116,65 kilometrdən 158,57 kilometrədək artırılması, ictimai nəqliyyat sisteminin təkmilləşdirilməsi nəzərdə tutulur.

Sənəddə şəhər əhalisinin məşğulluq imkanlarının artırılması üçün ümumşəhər əhəmiyyətli magistral küçələri boyunca ümumi sahəsi 77,2 hektar olan ictimai-işgüzar zonaların yaradılması planlaşdırılır.

Hazırda əhalinin səhiyyə və təhsil müəssisələri ilə təminat səviyyəsi qənaətbəxşdir. Baş plan layihəsi ilə hesabat müddəti ərzində əhalinin artımı nəzərə alınmaqla yeni sosial yönümlü obyektlərin yerləşdiriləcəyi ərazilər müəyyən olunub.

Goranboy şəhərinin Baş plan layihəsi ilə rekreasiya ərazilərinin sahəsinin 67,3 hektardan 203,3 hektara qədər artırılması təklif edilir. Bu ərazilər əsasən şəhərin şimal-qərb sərhədindən keçən Gorançayın sahili boyunca olan sahələrdir.

Baş plan layihəsi ilə ərazi üzrə külək rejimi nəzərə alınmaqla sənaye zonasının şəhərin şərq hissəsində, M-2 respublika əhəmiyyətli avtomobil yoluna çıxışı olan ərazidə layihələndirilib. Bu zonada əsasən yüngül sənaye müəssisələrinin yerləşdirilməsi nəzərdə tutulur.

Goranboy şəhərinin Baş planı Azərbaycan Respublikasının Nazirlər Kabinetinin 2022-ci il 29 noyabr tarixli müvafiq qərarı ilə təsdiqlənib.

XXX

30.11.2022
18:50

Goranboy şəhərinin 2039-cu ilədək inkişafına dair Baş planı təsdiqlənib.

Trend xəbər verir ki, Nazirlər Kabineti bununla bağlı müvafiq qərar verib.

Azərbaycan Respublikasının Dövlət Şəhərsalma və Arxitektura Komitəsinin sifarişi ilə hazırlanmış Goranboy şəhərinin Baş planı 2039-cu ilə qədər olan dövrü əhatə edir.

Baş planda nəzərdə tutulan illər üzrə şəhər əhalisinin yaşayış fondu, sosial və mədəni-məişət xidməti obyektləri üçün ərazilər nəzərə alınmış, şəhərin inkişafına uyğun olaraq təbii landşaftın qorunması və ərazi zonalarının nəzərə alınması ilə məskunlaşmanın aparılması prinsipi qorunmuşdur. Şəhərin infrastrukturunu təşkil edən nəqliyyat və mühəndis-kommunikasiya təminatı sistemlərinin genişləndirilməsi nəzərə alınmışdır.

Məqalədə:
Xəbər lenti

Xəbər lenti