Bakı. Trend:
Dünən - avqustun 27-də Moskvada Azərbaycanın Rusiyadakı səfirliyinin qonaq evi qarşısında ölkəmiz əleyhinə yönəlmiş çirkin bir təxribat törədilib. Naməlum şəxslər tərəfindən bina qarşısında Azərbaycan əleyhinə şəkillərin və şüarların yerləşdirilməsi təkcə dövlətimizə qarşı hörmətsizlik deyil, həm də beynəlxalq hüquq normalarının açıq şəkildə tapdalanmasıdır.
Bu insident fonunda ortaya çıxan ən ciddi sual isə ev sahibi olan dövlətin məsuliyyəti ilə bağlıdır. Beynəlxalq hüquqa və Vyana Konvensiyasına əsasən, xarici ölkədə fəaliyyət göstərən diplomatik nümayəndəliklərin, eləcə də onlara məxsus mülklərin təhlükəsizliyinin qorunması birbaşa həmin ərazidə yerləşən dövlətin — bu halda Rusiyanın hüquq-mühafizə orqanlarının vəzifəsidir. Səfirliyin binası və ya qonaq evi qarşısında keşik çəkən polislər bu təxribatın qarşısını vaxtında almalı və asayişi təmin etməli idilər.
Azərbaycan tərəfinin və Xarici İşlər Nazirliyinin hadisəyə dərhal rəsmi etiraz bildirməsi tamamilə haqlı və yerində atılmış addımdır. Çünki Azərbaycan öz ərazisində fəaliyyət göstərən bütün xarici səfirliklərə, o cümlədən Rusiya nümayəndəliklərinə ən yüksək səviyyədə təhlükəsizlik təminatı verir və hər hansı bir xoşagəlməz hadisəyə qətiyyən imkan vermir. Eyni məsuliyyətli, qarşılıqlı və hüquqa əsaslanan yanaşmanı Rusiyadan da gözləmək bizim ən təbii haqqımızdır.
Bu cür idarəolunmayan və təhrikedici hərəkətlər Azərbaycan-Rusiya arasındakı ikitərəfli münasibətlərə və strateji tərəfdaşlıq ruhuna yalnız mənfi təsir göstərir. Ona görə də gələcəkdə bu qəbildən olan siyasi təxribatlara yol verilməməsi üçün rəsmi Moskva hadisəni törədənləri qısa zamanda müəyyən edib məsuliyyətə cəlb etməli və diplomatik obyektlərimizin mühafizəsini gücləndirməlidir.
Əli Hüseynli,
Milli Məclisin deputatı
