Bakı. Trend:
İtaliyanın şimalındakı Pyemont bölgəsində ultrayüngül hava gəmisi süni Kampliççioli gölünün üzərindəki kabellərə çırpıldıqdan sonra qəzaya uğrayıb. Hadisə yerli vaxtla təxminən saat 11:30-da Kampliççioli bəndinin yaxınlığında baş verib.
Yanğınsöndürmə xidmətinin məlumatına görə, hava gəmisi kabellərə toxunduqdan sonra alışaraq gölün yaxınlığında yerə çırpılıb.
La Repubblica qəzetinin məlumatına görə, kiçik hava gəmisi avtojir olub. Bu, yuxarı hissəsində yerləşən rotoru mühərrik tərəfindən birbaşa hərəkətə gətirilməyən hava gəmisidir. Qəza nəticəsində 60 yaşlı kişi və 63 yaşlı qadın həlak olub. Hər iki şəxs Milan bölgəsindən olub.
Xilasetmə xidmətləri, o cümlədən yanğınsöndürmə xidmətinə məxsus helikopter hadisə yerinə qısa müddətdə cəlb olunub. Hava gəmisinin hansı bazadan uçduğu hələlik müəyyən edilməyib.
