"Yeni Siyasət" (YES) seçki bloku ilə Azərbaycançı Qüvvələr (AQ) seçki bloku arasında əməkdaşlıq imzalanarsa, mən şəxsən o mərasimdə iştirak etməyəcəm". Bu barədə Trend agentliyinə AQ seçki blokunun təsisçilərindən olan Vəhdət Partiyasının sədri Tahir Kərimli deyib.
T.Kərimli bu mövqeyini "YES" blokunda arzulamadığı şəxslərin təmsil olunması ilə əlaqələndirib: "Həmin blokda bir sıra siyasətçilər var ki, onlar vaxtilə Heydər Əliyev ideologiyasına xidmət edib, indi onun iqtidarına müxalifətdə durublar. Mən bunu qəbul etmirəm".
Vəhdət Partiyasının sədri onu da qeyd edib ki, belə insanlara hər bir blokda, elə AQ seçki blokunda da rast gəlmək mümkündür: "Belə insanlarla birgə seçkinin şəffaflığı və demokratikliyini təmin etmək mümkün deyil".
Bu şəxslərin adlarını açıqlamaq istəmədiyini deyən T.Kərimli iki blok arasında əməkdaşlığa yalnız razılıq verdiyini və fəaliyyətlərində uğurlar arzuladığını bildirib.