...

3 kq 295 qrama yaxın narkotik maddə NMR-də aşkar edilərək götürülüb

Siyasət Materials 25 Yanvar 2006 17:50 (UTC +04:00)

Naxçıvan Muxtar Respublikası (NMR) Daxili işlər nazirliyində 2005-ci ilin göstəriciləri əsasında kolleqiya iclası keçirilib. İclasda NMR daxili işlər naziri, daxili xidmət general mayoru Əhməd Əhmədovun hesabat məruzəsi dinlənilib və məruzə ətrafında müzakirələr edilib. Uğurlar və nöqsanlar təhlil edilib. Polis orqanlarının yaxşı işləməsi üçün şərait yaradılsa da, görülən işlər qənaətbəxş hesab edilməyib.

Əhalidən qanunsuz saxlanılan 306 odlu silah və 25 min 752 döyüş sursatı və hərbi ləvazimat göturülüb. Cinayatkarlarla mübarizə, ictimai qaydaların pozulması və təhlükəsizliyin təmin edilməsi sahəsində qarşıya qoyulan vəzifələr layiqincə yerinə yetirilib. Əhalinin hər 100 min nəfərinə düşən cinayətlərin sayı minimuma endirilərək 27,6 fakt olub. Adamları girov götürmə, oğurlanma, banditizm və digər bu kimi ağır hadisələr isə olmayıb. Hesabat dövründə nazirlik üzrə 104 cinayət hadisəsi qeydə alınıb. Cinayətlərin təsnifatına görə 24-ü ağır, 59-u az ağır, 21-i isə ictimai təhlükə törətməyən hadisələr olub. Ümumilikdə, cinayətlərin sayı azalsa da, Şərur, Sədərək, Ordubad, Culfa rayonlarında artıb. Cinayət törətdiyinə görə, 99 nəfər cinayətə cəlb olunub. Bunlardan 17 nəfər əvvəllər məhkum olmuş, 12-si xarici ölkə vətəndaşı, 9-u isə narkoman kimi profilaktiki uçota duranlardır.

Ötən il keçmiş illərdən bağlı qalmış 26 cinayətin icraatına xitam verilib. İclasda qeyd olunub ki, polis işçilərinin əsas vəzifələrindən biri vətəndaşlar arasında baş verə biləcək qanuna zidd əməllərin qarşısının vaxtından əvvəl alınması üçün profilaktiki, maarifləndirmə tədbirlərinin həyata keçirilməsidir. Düzdür, hesabat dövründə bu məqsədlə xeyli iş aparılıb. Lakin nəticə heç də müsbət olmayıb. Cinayətlərin sayı əvvəlki ilə nisbətən 6 fakt artıb. İclasda bu da qeyd olunub ki, narkomaniya bu gün dünyada sosial bəlaya çevrilib. Buna qarşı lazımi səviyyədə mübarizə aparmaq üçün dövlət tərəfindən tədbirlər görülür. Əsas vəzifə isə daxili işlər orqanlarının üzərinə düşür. Görülən tədbirlər nəticəsində ötən il narkotik, psixotrop maddələr və onların qanunsuz dövriyyəsi ilə bağlı törədilən cinayət faktları azaldılıb.

Hesabat ilində narkotik vasitələrin dövriyyəsi ilə məşğul olanlardan 3 kq 295 qrama yaxın narkotik maddə aşkar edilərək götürülüb, 27 cinayət faktı aşkar olunub. Cinayətlərin strukturu və dinamikası müsbətə doğru dəyişilərək istintaq və məhkəmə orqanlarından yayınan 53 nəfər təqsirli şəxsin 38-i aşkar edilib. İtkin düşmüş 4 nəfərin aqibəti isə məlum olmayıb. Cinayətlər nəticəsində dövlət mülkiyyətində olan əmlaka 3 milyon 495 min 771 manat ziyan dəymiş, ziyanın məbləği əsasən ödənib.

Nazirliyə vətəndaşlar tərəfindən 577 ərizə və müraciət daxil olub. Ərizələrin 40-ı aidiyyatlı təşkilatlara, 62-si ərazi polis orqanlarına göndərilib, 23-ü nəzarətə götürülüb. 382 vətəndaş qəbul edilib, şikayətləri nəzarətə alınıb, əksəriyyəti müsbət həll edilib, yazılı cavab verilib.

İclasda NMR-nın prokuroru, III dərəcəli dövlət ədliyyə müşaviri Səbuhi Şahverdiyev və Ali Məclisin qanunçuluq və hüquq-mühafizə orqanları ilə iş üzrə şöbəsinin müdiri Natiq Hüseynov çıxış edib, görülən işlərdən, nöqsanlardan və qarşıda duran vəzifələrdən danışıb.

Xəbər lenti

Xəbər lenti