Yaxın vaxtlarda keçmiş OMON-çu, Rusiyada həbs edilmiş Ələddin Məmmədovun Rusiya Federasiyasından Azərbaycana ekstradisiyası baş tutacaq. Bu barədə Trend ə Azərbaycan Respublikası Baş Prokurorluğunun Beynəlxalq Əlaqələr Şöbəsindən məlumat verilib.
Ələddin Məmmədov 1994-cü ilin məlum oktyabr hadisələrində iştirakçılıqda təqsirli bilinir. O, Azərbaycanda qanunsuz silahlı birləşmələrin tərkibində dövlət çevirilişinə cəhdin fəal iştirakçılarından biri hesab olunur.
1994-cü ildən həbsli axtarışda olan keçmiş OMON-çu uzun müddət Rusiya Federasiyası ərazisində gizli şəkildə yaşayıb. 2006-cı ildə isə barəsindəki həbsli axtarışa əsasən həmin ölkədə həbs olunub. Hazırda onun ekstradisiyası məqsədilə Azərbaycanın Baş Prokurorluğu və Ədliyyə Nazirliyi tərəfindən Rusiya hökumətinə təqdim edilmək üçün müvafiq sənədlər hazırlanır.