Azərbaycan, Bakı, 25 aprel / Trend , müxbir C.Babayeva/ Cümə günü Bakıda BMT-nin İnkişaf Proqramı və Ekologiya və Təbii Sərvətlər Nazirliyi arasında "Azərbaycanda bərk tullantıların idarə olunması işinin təkmilləşdirilməsi" layihəsi imzalanıb. Layihə ekologiya və təbii sərvətlər naziri Hüseyn Bağırov və BMT-nin rezident əlaqələndiricisi Bruno Pueza tərəfindən imzalanıb.
İki il yarım müddətində həyata keçiriləcək layihə bərk tullantıların idarə olunması sahəsində yeni qayda və standartların yaradılması, təkrar emal və təkrar istifadə üzrə strategiyaların hazırlanması və bərk tullantılar üzrə məlumatların toplanması işinin təkmilləşdirilməsi üçün Azərbaycan hökumətinə texniki yardım göstərəcək.
Layihənin birgə maliyyələşdirilməsi BMT-nin İnkişaf Proqramı (350 min ABŞ dolları) və Norveç hökuməti (550 min ABŞ dolları) tərəfindən həyata keçiriləcək.
Puezanın sözlərinə görə, Azərbaycanda iqtisadi inkişafın artması bərk tullantıların idarə olunmasında ciddi problemlər yaradır. "Azərbaycan hökuməti bu problemlərdən xəbərdardır və müvafiq addımlar atır", deyə Pueza bildirib.
"Layihə çərçivəsində tullantıların tərkibi, xüsusiyyəti və əmələ gəlməsinə dair araşdırmalar aparılacaq və bərk tullantılara dair məlumat bankının yaradılmasına köməklik göstəriləcək. Bu məlumatlar Azərbaycan hökumətinə bərk tullantıların idarə olunmasına dair düzgün və əsaslandırılmış qərar verməyə imkan yaradacaq", deyə Pueza qeyd edib.
