Azərbaycan, Bakı, 05 may / Trend , müxbir K.Zərbalıyeva/ "Azadlıq" qəzetinin bıçaqlanan jurnalisti istintaqdan narazı qaldığı üçün məhkəməyə müraciət edəcək.
Aqil Xəlilin vəkili Elçin Sadıqov bazar ertəsi Trend a bildirib ki, jurnalistin bu il fevralın 22-də "Zeytunlar bağı" adlanan ərazidə döyülməsi ilə əlaqədar cinayət işinin açılması, aparılan araşdırmanın qanunsuz hesab edilməsi və onu döyən şəxslərin müəyyənləşdirilib cinayət məsuliyyətinə cəlb olunmasını məhkəmədən tələb edəcək.
Vəkil istintaqın qanunsuz hərəkətlərindən məhkəmə nəzarəti qaydasında çərşənbə axşamı Bakının Nəsimi rayon məhkəməsinə müraciət edəcəyini bildirib.
Baş Prokurorluğun mətbuat xidmətinin rəhbəri Vüqar Əliyev isə bildirib ki, Xəlilin döyülməsi faktı bıçaqlanması ilə əlaqədar başlanmış cinayət işinə birləşdirilib və hazırda istintaq davam edir.
"Azadlıq" qəzetinin əməkdaşı Xəlil bu il martın 13-də işdən evə qayıdarkən bıçaqlanıb.
Respublika Prokurorluğunun yaydığı məlumatda qeyd olunur ki, Xəlil qeyri-ənənəvi intim münasibətlərdə olduğu şəxs tərəfindən qısqanclıq zəmnində bıçaqlanıb.
Həmin şəxs həbs olunub və Cinayət Məcəlləsinin qəsdən sağlamlığa az ağır xəsarət yetirmə və satış məqsədi olmadan qanunsuz şəkildə narkotik vasitələri əldə etmə və saxlama maddələri ilə təqsirləndirilir.
Müəlliflə əlaqə saxlamaq üçün elektron ünvan - [email protected]
