Azərbaycan, Bakı,21 may / Trend , müxbir K.Zərbalıyeva/ Ombudsman Aparatının əməkdaşları Ombudsmanın tapşırığı ilə, boksçu Ramal Amanovun döyülməsi məlumatı ilə əlaqədar, DİN-in İstintaq Təcridxanasında araşdırma aparıb.
Sidney Olimpiadasının boks üzrə bürünc mükafatçısı Vüqar Ələkbərov və Avropa, dünya çempionatlarının iştirakçısı olmuş Amanov DİN Baş Mütəşəkkil Cinayətkarlıqla Mübarizə İdarəsinin əməkdaşları tərəfindən yaxalanıblar. Onlar "İnşaatçı-E" MMC-nin təsisçisi Kənan Quliyevdən zor tətbiq etməklə, "Toyota" markalı avtomobilini və 10000 dollar almaq istədiklərinə görə saxlanıblar.
Ombudsman Aparatının mətbuat xidmətinin çərşənbə günü yaydığı məlumatda bildirilir ki, Baş Mütəşəkkil Cinayətkarlıqla Mübarizə İdarəsinin (BMCMİ) müvəqqəti saxlama təcridxanasında (MST) aparılan araşdırma zamanı Amanovun həmin idarənin təcridxanasında saxlanılması barədə məlumat təsdiqlənməyib.
Aparatın əməkdaşları Amanovla birlikdə tutulan bokscu Vüqar Ələkbərovla görüşüblər. Söhbət zamanı o, saxlanıldığı müddətdə müəssisə əməkdaşları tərəfindən ona qarşı zorakılıq hallarına və insan ləyaqətini alçaldan münasibətə yol verilmədiyini, saxlanma şəraitindən şikayətinin olmadığını bildirib.
Amanov hazırda azadlıqda olsa da, Ələkbərov Cinayət Məcəlləsinin hədə-qorxu ilə tələb etmə (182.3.2) maddəsi ilə təqsirləndirilərək, Nərimanov rayon məhkəməsinin qərarı ilə həbs olunub.
Müəlliflə əlaqə saxlamaq üçün elektron ünvan - [email protected]
